Kólik mınıstri Nurlan Saýranbaev Úkimette ótken brıfıngte Almaty halyqaralyq áýejaıy ǵımaratynyń shatyry nóser jaýynǵa tolyq eseptelmegenin málimdedi, dep habarlaıdy Egemen.kz.
Eske salsaq, 3 mamyr kúni áleýmettik jelilerde áýejaıdyń tóbesinen sorǵalap sý aǵyp jatqan sáttiń vıdeosy taraǵan bolatyn. Nóser saldarynan tekserý jáne pasport baqylaý aımaqtaryn sý basyp, termınal mańyndaǵy aýmaq ta zardap shekken edi.
Mınıstrdiń aıtýynsha, shatyr jobalanǵan kezde sý júktemesi 230 lıtr kóleminde eseptelgen. Alaıda jaýyn-shashyn mólsheri kútkennen áldeqaıda kóp bolǵan.
«Joǵarǵy bólikte úlken sýaǵar bar, ol kádimgi úlken aryq sekildi. Eger ol tolyp ketse, jan-jaǵyndaǵy ashyq bólikter arqyly sý syrtqa aǵýy kerek. Biraq jańbyr óte qatty bolǵandyqtan, sý ishke qaraı ketken», dedi Saýranbaev.
Onyń sózinshe, áýejaı nysany jeke menshikke tıesili jáne barlyq jóndeý jumystaryn áýejaı basshylyǵy óz moınyna alǵan.
Mınıstr sondaı-aq áýejaı ıesi Groupe ADP-nyń quramyna kiretinin atap ótti. Bul kompanııa Parıj áýejaıy nysandaryna da ıelik etedi. Sondyqtan Almatydaǵy jaǵdaı kompanııa bedeline de áser etken.
«Qazir bul másele boıynsha úlken talqylaýlar júrip jatyr. Kompanııa jyl sońyna deıin júıeni tolyq túzetý mindetin aldy. Sýaǵarlarǵa qosymsha sý burý arnalary ornatylady», dedi mınıstr.
Nurlan Saýranbaevtyń aıtýynsha, jóndeý jumystary jaqyn arada aıaqtalýy tıis. Ol sol kúni qaladaǵy ózge ǵımarattar da sý astynda qalǵanyn aıtty.
Aıta keteıik, Almaty áýejaıynda 11 keli esirtkimen sheteldik ustalǵan bolatyn.
Jyldyń basynda Almaty áýejaıynda 6,8 mlrd teńge somasynda zańbuzýshylyqtar anyqtaldy.