Elordada «Altyn Orda – dala órkenıetiniń úlgisi: tarıh, arheologııa, mádenıet, biregeılik» atty halyqaralyq sımpozıýmy ótip jatyr. Jıynda Memleket basshysy Qasym-Jomart Toqaev tarıhqa ádil ári saıası turǵydan beıtarap baǵa berý kerektigin atap ótti, dep habarlaıdy Egemen.kz.
Prezıdenttiń aıtýynsha, «tarıhty jeńimpazdar jazady» degen qaǵıdat tarıhı oqıǵalardy birjaqty túsindirýge ákelýi múmkin.
«Tarıhty jeńimpazdar jazady» degen qaǵıdattyń ǵylymǵa qarsy sıpatyn umytpaǵan jón. Iаǵnı jeńimpazdardy jazǵyrýǵa bolmaıdy, álem tarıhynyń tórinen oryn alyp, zertteýshilerdiń maqtaý-madaǵyna ıe bolady. Al shaǵyn jáne orta memleketter, sonyń ishinde maıdanda jeńilis tapqan elder tarıhtyń tasasynda qalady», dedi Qasym-Jomart Toqaev.
Sonymen qatar Prezıdent kóshpeli halyqtarǵa qatysty qalyptasqan eski stereotıpterdi qaıta qaraý úderisi bastalyp ketkendigin aıtty.
«Qazaqstanda saıasattyń paıdasy úshin kóshpeli halyqtardy jabaıy, beı-bereket, tarıh sheńberinen tys kúsh retinde kórsetip, qýatty dala ımperııalaryn «memleket deńgeıine jete almaǵan» dep tómendetetin eski dogmalar men qasań kózqarastardy qaıta qaraý úderisi bastalyp ketti. Bul rette biz shynaıy tarıhnamany qalpyna keltire otyryp, ótkendi ásireleýden aýlaqpyz. Tarıh ózine tánti bolǵan jalǵan áreketterdi, ortaq murany jekelegen halyqtyń qanjyǵasyna baılap berýdi keshirmeıdi. Kereǵarlyqtar men kedergilerge toly baı tarıhymyzdy birjaqty túsindirýge qoıylatyn talap ǵylymnyń quldyraýyna jáne ózara senimniń joǵalýyna ákeletin tuıyqqa tireıdi», dedi Memleket basshysy.
Prezıdent tarıhshylardyń mıssııasy qazirgi almaǵaıyp kezeńde mańyzdy bolyp turǵanyn atap ótip, Altyn Orda tarıhy kóptegen irgeli zertteýlerge arqaý bolǵandyǵyna toqtaldy. Budan bólek, Memleket basshysy elimiz IýNESKO-nyń qoldaýymen kóptegen mańyzdy jobany júzege asyrǵandyǵyna basa mán berip ótti.