Qazaqtyń eń kórnekti epostarynyń biri «Qozy Kórpesh – Baıan Sulý» zamanaýı tehnologııa arqyly jańasha sıpat aldy. 29 sáýirde kópshilikke «Mahabbat serti» atty JI negizindegi medıajobanyń treıleri usynylyp, tanys hıkaıanyń jańa qyry ashyldy, dep jazady Egemen.kz.
Tórt bólimnen turatyn «Mahabbat serti» JI-fılminde mahabbat pen adaldyq taqyryby zamanaýı tásilmen qaıta zerdelengen. Joba epos keıipkeriniń esimimen úndesetin «Baıan Sulý» kondıterlik fabrıkasynyń qoldaýymen júzege asqan.
«Biz úshin bul – júıeli baǵyt. Buǵan deıin «Qozy Kórpesh – Baıan Sulý» teatr qoıylymyn qoldasaq, endi osy oqıǵanyń tehnologııalyq formattaǵy jalǵasyn kórip otyrmyz. Baıan Sulý týraly ańyz – bizdiń mádenı kodymyzdyń bir bóligi. JI-serıal arqyly eposty jańa qyrynan tanytyp, onyń mazmunyn saqtaı otyryp, jas aýdıtorııaǵa jetkizýge múmkindik bar. Biz mundaı jobalar dástúr men zamanaýılyqty ushtastyrady dep senemiz», dedi «Baıan Sulý» AQ prezıdenti Tımýr Sadykov.
Fılmde sezimderi túrli kedergilerge, satqyndyqqa jáne tragedııaǵa ushyraıtyn qos ǵashyqtyń taǵdyry baıandalady. Joba qazaq tilinde kásibı dybystalyp, orys jáne aǵylshyn tilderinde sýbtıtrlermen usynylady. Kompanııa málimetinshe, dybystaý jumystaryna arnaıy dýblıaj akterleri tartylǵan.
Kórinisterdi vızýalızasııalaý, sıfrlyq keıipkerler jasaý jáne beıneni óńdeý barysynda jasandy ıntellekt keńinen qoldanylǵan. Nátıjesinde oqıǵa jańa vızýaldyq sıpatqa ıe bolyp, aýdıtorııaǵa túsinikti bola túsken.
Qazaqstannyń baılyǵyn jasandy ıntellekt izdeı bastady
«Mahabbat serti» jobasynyń tusaýkeseri 2026 jyldyń mamyr aıynyń ortasyna josparlanǵan. Kórermen qaýym fılmniń barlyq bólimin Adai Media Group kompanııasynyń áleýmettik jelilerdegi paraqshalarynan erkin tamashalaı alady.
Joba avtorlarynyń aıtýynsha, bul týyndy – epostyń túrli nusqalaryn, sonyń ishinde aqyn Janaq murasy men Ǵabıt Músirepov pesasyn negizge alǵan avtorlyq paıym.
«Túpnusqa rýhyn saqtaı otyryp, keıbir sıýjettik jelilerdi ózgertip, zamanaýı fılosofııalyq mán qostyq. Bul – máńgilik mahabbat taqyrybyna jańasha kózqaras», deıdi olar.
Jobany jasaýshylar JI formaty eń aldymen sıfrlyq platformalar arqyly kontent tutynatyn jas býynǵa baǵyttalǵanyn atap ótti. Al «Baıan Sulý» kompanııasy mundaı bastamalar klassıkalyq týyndylardy mektep baǵdarlamasynan tys formatta tanystyrýdyń tıimdi jolyna aınalady dep esepteıdi.
Endi Ulttyq ulan sarbazdarynyń emosııalyq jaǵdaıyn jasandy ıntellekt baqylaıdy
Aıta keteıik, bul – kompanııanyń ulttyq murany dáripteýdegi alǵashqy qadamy emes. 2024 jyly «Baıan Sulý» Muhtar Áýezov atyndaǵy Qazaq ulttyq drama teatrynda qoıylǵan «Qozy Kórpesh – Baıan Sulý» spektakline qoldaý kórsetken edi. Sol kezde bastama mádenı murany nasıhattaýmen qatar, 15 sáýir – Ulttyq ǵashyqtar kúnin dáripteýge baǵyttalǵan edi.