Anglııanyń kúndelikti shyǵatyn «Guardian» gazetiniń habaryna qaraǵanda, Mýammar Kaddafıdiń senimdi ókili osy eldiń bıligimen kelissóz júrgizýge kelipti. Ol daǵdarystan shyǵýdyń «strategııasyn talqylaýdy» usynǵan kórinedi.
Bul Trıpolıdiń koalısııa avıasoqqylary bastalǵannan bergi beıbit kelisimge umtylǵan alǵashqy qadamy emes. Munyń aldynda AQSh-tyń Memlekettik hatshysy H.Klınton da Kaddafıdiń adamdary ózderimen kelisim jasaýǵa tyrysqandary týraly jarııalaǵan edi. Osynyń aldynda Ulybrıtanııaǵa Lıvııanyń syrtqy ister mınıstri Mýsa Kýsa ushyp kelip, Kaddafıdiń saıasatynan bas tartatynyn málimdep, saıası baspana suraǵan edi.
JUMSARTSA DA JULQYNÝLARYN QOIMAIDY
Belorýssııadaǵy prezıdenttik saılaý ótkeli úsh aıdan beri basylmaı kele jatqan daýdyń daýasyn tabýǵa qadam jasaldy. Bılik saılaý kezinde eldi ereýilge shyǵýǵa úgittegenderdiń áreketin endi qoǵamdyq tártipti dórekilikpen buzý degen bappen aıyptaıtynyn jarııalady.
Bul bappen olarǵa qoldanylatyn jazanyń eń aýyry alty aıǵa deıin bas bostandyǵynan aıyrý, áıtpese, aıyppulmen qutyltý. Al aıyptaýdyń burynǵy baby «jappaı tártipsizdikke jol berý» bolatyn. Bul bappen tártipsizdikti uıymdastyrýshylar 15 jylǵa deıin sottalýy múmkin edi. Biraq oppozısııa bıliktiń bul qadamyna da den qoıyp otyrǵan joq, olar ózderin tolyǵymen aqtaýdy talap etýde.
EREÝILGE TYIYM SALÝǴA QARSYLYQ
Máskeý men Sankt-Peterbýrgte Reseı konstıtýsııasynyń qarsylyq mıtıngilerin ótkizýge tyıym salatyn 31-babyna qarsy «Strategııa-31» atty sherýler jalǵasyp keledi. Oǵan Máskeýge qaraǵanda eldiń soltústik astanasynda qatysqandar birneshe ese artyq boldy.
Eldiń astanasynda eki jerde bolǵan mıtıngtiń birin jazýshy E.Lımonov, ekinshisin máskeýlik Helsınkı tobynyń basshysy L.Alekseeva uıymdastyrdy. Ereýilshiler basshylarynyń bárin de polısııa ýaqytsha tutqynǵa aldy. Reseıde 1 naýryzdan bastap kúshine engen «Polısııa týraly» zańnyń talaby boıynsha ustar aldynda polısııa qyzmetkeri ózin tanystyryp, sosyn tutqyndalýshynyń quqyn aıtyp berýi kerek-tin. Biraq ýaqytsha tutqyndaý kezinde onyń biri de bolmaǵan.
AILYǴY JAQSY BOLSA, ATOM DA QAÝIPSIZ
AQSh-ta Japonııadaǵy «Fýkýsıma-1» AES-i jarylysynyń zardaptaryn joıýǵa kómek berý úshin mamandar tobyn jasaqtaý júrgizilip jatyr. Olardan buryn atom ónerkásibinde istep, tájirıbe alǵandyǵy, sonymen birge, jaqyn týystarynyń kelisimi talap etiledi.
Aldaǵy jeksenbide AQSh-ta jasaqtalǵan 10 adamnan turatyn alǵashqy top Japonııaǵa attanbaqshy. Adamdardy radıoaktıvti qateri bar jerge barýǵa yntalandyryp otyrǵan, árıne, aqsha. Aldyn-ala aıtylǵan málimet boıynsha, olarǵa tólenetin jalaqy osy salada qalypty jaǵdaıda qyzmet isteıtinderge qaraǵanda eselep arttyrylatyn kórinedi.
JARYLYSTARDY JAQYNDARY DA JASAIDY
Grýzııanyń arnaýly qyzmeti Kýtaısı qalasynyń merııasy men ádilet úıinde jarylys jasamaq bolǵan úsh kúdiktini ustady. Olardyń kórsetýinshe, jarylysqa tapsyrys berip, uıymdastyrǵan Reseıdiń Federaldyq qaýipsizdik qyzmetiniń (FQQ) ofıseri Alekseı Ýshakov eken.
Bul Reseı tarapynan uıymdastyrylyp otyrǵan birinshi lańkestik emes. Munda 2010 jyldyń kúzinde de Reseı FQQ qatysqan jarylystar bolǵan. Ony uıymdastyrǵan maıor E.Borısov ekeni anyqtalyp, Grýzııa Interpol tarapynan oǵan izdeý salýǵa qol jetkizgen. Sonymen birge, Grýzııa jaǵy adjar sheneýnigi D.Kordadzeniń ólimine de FQQ-nyń qatysty ekenin aıtyp otyr.
BIR-BIRIN AIYPTAÝDAN TANBAI TUR
Ýkraınanyń burynǵy prezıdenti Leonıd Kýchmanyń ústinen jýrnalıst Georgıı Gongadzeniń ólimine qatysy bar degen kúdikpen qylmysty is qozǵalǵan edi. Oǵan negiz bolǵan eks-prezıdenttiń burynǵy saqshysy N.Melnıchenkonyń beınetaspasy bolatyn.
V.Iýshenkonyń kezinde birshama saıabyrsyǵan sol is qazir qaıtadan bas kóterip, osy kúnderi L.Kýchma da, N.Melnıchenko da Ýkraına bas prokýratýrasyna jıi keletin bolyp júr. L.Kýchma ózine taǵylǵan aıypty tolyǵymen joqqa shyǵarady, al N.Melnıchenko da ony aıyptaýynan tanar emes. Jýyrda ol L.Kýchma qazirgi prezıdent V.Iаnýkovıchten isti qysqartýdy talap etip, bopsalady degen málimdeme taratty.
QYSQA QAIYRYP AITQANDA:
Jýyrda, Kıevte Lıvııadaǵy jaǵdaıdy saralaǵan Reseı men Ýkraına sarapshylarynyń jıyny boldy. Onda Lıvııadaǵy soǵys energııa resýrstaryn qaıta bólmekke umtylyp jatqan alpaýyttardyń álegi dep baǵalandy.
AQSh-tyń Kýınnıpıak ýnıversıteti saýaldama júrgizip, onyń qorytyndysy boıynsha B.Obamany qoldaıtyndar úlesi 42 paıyzǵa deıin túsip ketkenin anyqtady. Bul nátıje Amerıkanyń Lıvııa soǵysyna aralasqanynan keıin bolyp otyr.
Kot D’Ivýarda prezıdenttik saılaýda jeńse de, taqqa qol jetkize almaı otyrǵan A.Ýattaranyń jaqtastary L.Gbagbonyń gvardııasymen qatty shaıqasýda. Keshe olar memlekettik televızııany basyp aldy.
Qytaı ǵylym jetistikteri jaǵynan qazir álemde ekinshi orynǵa shyqty. Tipti AQSh-taǵy kóptegen ınnovasııalar men jańa tehnologııalar Qytaı ǵalymdarynyń qoldarymen iske asa bastaǵany moıyndalyp otyr.
Ázirbaıjan tarapynyń Stepanakertke ótken ushaqtar atyp túsiriledi degenine qaramastan, Armenııa prezıdenti S.Sargsıan Taýly Qarabaqtaǵy jańa áýejaıǵa birinshi jolaýshy bolyp baratynyn jarııalady.
Internet materıaldary negizinde ázirlendi.