Eýropa keńesi parlamenttik assambleıasy delegasııasynyń málimdemesinde PA delegasııasy (EKPA) 2011 jyldyń 3 sáýirinde bolyp ótken Qazaqstan Respýblıkasynyń kezekten tys prezıdenttik saılaýy joǵary deńgeıde uıymdastyrylǵanyn qýana quttyqtaıtyny aıtylǵan. Saılaýǵa jaýapty laýazymdy adamdar óz jumystaryn tıimdi uıymdastyryp, ózderiniń kásibı sheberlikterin kórsetti. Biz baıqaǵan saılaý ýchaskeleri saılaýdy óz deńgeıinde ótkizý úshin barlyq jaǵdaı jasalǵandyǵymen erekshelendi. Jalpy, saılaý aýany iskerlik jaǵdaıyn baıqatty. Adamdardyń saılaý ýchaskelerine kelýi joǵary deńgeıde boldy, bul jurtshylyqtyń úderiske senimdiligin kórsetti.
Delegasııa BAQ-tarda saılaýaldy naýqany teńdestirilgen jaǵdaıda ótkendigin aıǵaqtaıtyn táýelsiz baıqaýshylardyń aqparattandyrylýynan da aıqyn kórindi. Saılaý úderisteri jurtshylyqtyń atalǵan naýqanǵa keń kólemde daıyndalǵandyǵyn anyq kórsetip berdi, delingen málimdemede.
Osy ýaqytta EKPA delegasııasy teńdeı emes saılaý jaǵdaıyna, keıbir saıası kúshterdiń saılaýǵa boıkot jarııalaý týraly shaqyrýlaryna alańdaýshylyq bildirip, elektorat úshin saılaý qysqarǵan turǵyda ótti. Soǵan qaramastan, osy jaı Qazaqstanda kúshti oppozısııa qurý qajettigin atap kórsetti. Sondyqtan EKPA Qazaqstandaǵy saıası mádenıettiń odan ári damýyna septesýge árkez daıyn. Bul óz kezeginde saıası tuǵyrnamalardyń keń múmkindigin tańdaýǵa kómektesedi. Sonymen birge, burynǵy saılaýlarmen salystyrǵanda úderistiń óz deńgeıinde ótkenimen, shynaıy demokratııa mártebesin ıelený úshin Qazaqstanǵa áli de bolsa keıbir nárselerdi jaqsartqan artyqtyq etpeıdi.
EKPA Qazaqstandaǵy saılaýlardy buǵan deıin-aq baıqaǵan bolatyn. Soǵan oraı saılaýdan saılaýǵa deıingi ahýaldyń jaqsy jaǵyna qaraı ózgergenin qanaǵat sezimimen atap kórsetedi. Delegasııa kez kelgen eldegi saılaýlarda kórinis beretin keıbir kemshilikterge qaramastan, bul saılaýdyń nátıjeleri qazaqstandyq saılaýshylardyń erkin shyn máninde anyq kórsetetinin atap ótedi.
* * *
«Aq jol» demokratııalyq partııasynyń tóraǵa Álıhan Baımenov qol qoıǵan málimdemesinde Qazaqstan Respýblıkasynyń kezekten tys prezıdenttik saılaýy N.Á.Nazarbaevtyń aıqyn jeńisimen aıaqtalǵany aıtylǵan.
Biz Elbasyn qoǵamdyq qoldaýdyń joǵary deńgeıi Qazaqstannyń básekelestikke qabilettigin arttyrý jolynda eldi jumyldyrýdyń negizi bolatynyna senimdimiz. Saılaý nátıjesi ekonomıkalyq reformalar men áleýmettik-saıası modernızasııalaýdyń kelesi kezeńin júzege asyrýǵa baǵyttalǵan baǵdarlamany qoldaýdyń keń kólemdi áleýmettik tiregi bar ekenin kórsetti.
Nursultan Ábishulyn jeńisimen quttyqtaı otyryp, eldi órkendetý, halyq ahýalyn kóterý, memlekettilikti nyǵaıtý jáne Qazaqstannyń demokratııalyq damýy baǵytyndaǵy qyzmetine tabys tileımiz, delingen málimdemede.
* * *
Prezıdenttik saılaýda kandıdat bolyp túsken Mels Eleýsizov saılaý qorytyndysyna oraı málimdeme jasady. Meni qoldap, maǵan daýys bergen azamattardyń barlyǵyna rızashylyǵymdy bildiremin. Sondaı-aq men saılaý naýqanynda men úshin ter tókken qoldaýshylaryma da rızamyn, deıdi óz málimdemesinde M.Eleýsizov.
Kóptegen qazaqstandyqtardyń meniń tuǵyrnamamdy qoldaýy meniń alǵan baǵytymnyń durys ekenin kórsetedi. Men aldaǵy ýaqytta da baıaǵysynsha Qazaqstannyń demokratııa jolymen damyp, memlekettiligimizdiń nyǵaıyp, azamattyq qoǵamnyń damýy jolynda ter tóge bermekpin. Árıne, bul rette meniń ekologııalyq qaýipsizdik máselesin de nazardan tys qaldyrmaıtynym belgili.
Qazaqstandaǵy prezıdenttik saılaýdyń erkin ári ádil jáne qoldanystaǵy zań talaptaryna saı ótkendigin moıyndaý kerek.
Men Ortalyq saılaý komıssııasy jarııa etken daýys berý qorytyndysy berilgen daýystardyń shyn mánindegi nátıjesi bolady dep úmittenemin. Qazaqstan halqynyń basym bóligi damyǵan memleket pen demokratııalyq qoǵam qalyptastyrýdaǵy jetistikterdi Nursultan Nazarbaevpen baılanystyrady. Naqty ári ádil básekelestik meniń búgingi memleketke tap osyndaı kóshbasshy qajet ekendigine kózimdi jetkizdi.
Sondyqtan da men Nursultan Nazarbaevty saılaýdaǵy senimdi túrdegi jeńisimen quttyqtaımyn jáne oǵan Qazaqstan halqyna qyzmet etý jolyndaǵy eńbekterine tabys tileımin.
* * *
Prezıdenttikke kandıdat Ǵ.Qasymov kezekten tys prezıdenttik saılaýdyń qorytyndylary boıynsha málimdeme jasady.
О́tken prezıdenttik saılaý Qazaqstandy demokratııalyq jáne quqyqtyq memleket qurý baǵytyna qaraı ilgeriletý jóninde tańdaǵan bizdiń jolymyzdyń durystyǵyn taǵy bir ret aıqyndady. Men qazaqstandyqtardyń edáýir bóliginiń bizdiń saılaýaldy tuǵyrnamamyzdy keńinen qoldaıtynyna jáne Qazaqstannyń barlyq óńirinde jaqtastarymyz ben pikirlesterimizdiń sany artyp otyrǵanyna kózim jetti. Sondyqtan da maǵan daýys bergenderge, sondaı-aq saılaý naýqany barysynda meni qoldap qajymas kúsh-jiger tanytqan áriptesterime ózimniń rızashylyǵym men alǵysymdy bildiremin, degen Ǵ.Qasymov.
Saılaý naýqany ashyq, ádil ári meılinshe demokratııalyq negizge quryldy.
Biz ómirge shynaıy kózqaraspen qarap, alǵa kóz jiberýimiz kerek. Al, ómirdiń shyndyǵyna kelsek, qazaqstandyqtardyń basym bóligi Nursultan Nazarbaevtyń Memleket basshysy bolyp qalýyna daýys berdi. Bul aıqyn jeńis búkil halyqtyń Tuńǵysh Prezıdentimiz júrgizip otyrǵan dana saıasatyna degen joǵary senimin aıǵaqtap berdi. Jańa saılanǵan Prezıdentti jarqyn jeńisimen quttyqtaı otyryp, Elbasyna Qazaqstannyń aldaǵy órkendeý jolyndaǵy eńbegine jemis tileımin, delingen Ǵ.Qasymov málimdemesinde.