Kandıdattyqqa 188 adam tirkeldi

Keshe Qazaqstan Respýblıkasy Ortalyq saılaý komıssııasynyń múshesi Marat Sársembaev máslıhattardyń shyǵyp qalǵan depý­tat­tarynyń ornyna kandıdattardy tirkeý qorytyndylary jáne olardyń saılaýaldy naýqandy júrgizýi týraly brıfıng ótkizdi. Ortalyq saılaý komıssııasy múshesiniń habardar etýinshe, más­lı­hattardyń shyǵyp qalǵan depýtat­tarynyń ornyna saılaý naýqany sheńberinde elimiz boıynsha saılaý ótetin 58 saılaý okrýginde bo­saǵan depýtattyq mandattarǵa barlyǵy 201 úmitker usynyldy. Al okrýgtik saılaý komıssııalarynyń más­lıhattardyń shyǵyp qalǵan depýtattarynyń ornyna kandıdattar retinde tirkeý kezeńiniń qory­tyndysynda boıynsha 188 adam tirkeldi. Osylaısha, qazirgi ýaqytta máslıhattardyń shyǵyp qalǵan depýtattarynyń ornyna saılaýda bos bir depýtattyq mandatqa ortasha básekelestik úshten asa úmitkerdi quraıdy. «Kandıdattardyń 62-si Qa­zaq­stan Respýblıkasy saıası partııa­larynyń músheleri, 69-y partııa qatarynda joqtar, 57-si óziniń partııaǵa tıesiligin kórsetpegen, – dedi M.Sársembaev. – Qazirgi kezde tir­kelgen kandıdattardyń saılaýaldy úgit naýqany júrip jatyr. Saılaý zańnamasyna sáıkes, saılaýaldy úgitti júrgizý úshin barlyq kandıdattarǵa teń jaǵdaılarǵa kepildik beriledi. Atap aıtqanda, memleket kandıdattarǵa teledıdardan 15 mınýt sóz sóıleýine, radıodan 10 mınýt sóz sóıleýine, son­daı-aq, baspa basylymdarynda 0,1 baspa tabaqtan aspaıtyn kólem­de eki maqala jarııalaýyna kepildik beredi». OSK múshesiniń atap ótkenindeı, jergilikti atqarýshy organdar tıisti saılaý komıssııalarymen birlesip barlyq kandıdattar úshin úgittik baspa materıaldaryn ornalastyrý úshin oryn belgileıdi jáne olardy stendtermen, taqtalarmen, tuǵyrlyqtarmen jaraqtandyrady. Úgittik baspa materıaldary barlyq kandıdattar úshin teń quqyqtar qamtamasyz etetin jaǵdaıda ornalastyrylady. Tirkelgen árbir kandıdat saılaýaldy úgit júrgizý úshin kandıdattyń jeke qarajatynan (2 445 900 teńgeden aspaıtyn), kan­dı­datty usynǵan qoǵamdyq birles­tik bólgen qarajattan (4 891 800 teńgeden aspaıtyn) jáne el aza­mattary men uıymdarynyń erikti qaıyrmaldyqtarynan (7 337 700 teń­geden aspaıtyn) turatyn óziniń saılaý qoryn qura alady. Más­lıhattyń depýtattyǵyna kandı­dattyń saılaý qoryndaǵy aqshalaı qarajattyń shekti mólsheri 14 675 400 teńgeden aspaýy tıis. BAQ shart negizinde tirkelgen kandıdattarǵa efır ýaqytyn jáne baspasóz betinen oryn beredi. Bul rette shart talaptary belgili bir kandıdatqa artyqshylyq týǵyzbaýǵa tıis, – dedi M.Sársembaev ári qaraı. – Saılaý qoryn qurmaıtyn azamattar qarjylandyrýdy qajet et­peıtin saılaýaldy úgit júrgizýge qu­qyly. Saılaý kúni jáne onyń al­dyndaǵy kúni BAQ-ta úgit materıaldaryn jarııalaýǵa jol berilmeıdi. Al úgit naýqany 2017 jylǵy 24 naýryz kúngi saǵat 24.00-ge deıin jalǵasady». * * * Keshe, sondaı-aq, Ortalyq saılaý komıssııasynyń otyrysy ótti. Onda «Nur Otan» partııasynyń múshesi Albert Pavlovıch Raý­dy Qa­­zaqstan Respýblıkasy Parla­menti Májilisiniń depýtaty etip tirkeý týraly sheshim qabyldandy. Sheshim «Qazaqstan Respýb­lı­kasyndaǵy saılaý týraly» Qazaq­stan Respýblıkasynyń 1995 jylǵy 28 qyrkúıektegi Konstıtýsııalyq zańynyń 46, 97-1 jáne 98-baptary­na sáıkes, «Nur Otan» partııa­sy Saıası keńesi bıýrosynyń qaý­lysy negizinde qabyldanyp otyr. Albert Raýǵa Ortalyq saılaý ko­mıssııasynyń tóraǵasy Berik Ima­shev Parlament Májilisi depýta­tynyń kýáligi men omyraýǵa taǵatyn belgini tapsyrdy. Álısultan QULANBAI, «Egemen Qazaqstan»