DOSTYQ FESTIVALI – BIRLIK BASTAÝY. Aqtóbe qalasyndaǵy «Dostyq» úıinde táýelsizdiktiń 20 jyldyǵyna oraı «Táýelsiz el – Qazaqstan» atty oblystyq halyq dostyǵynyń festıvali ótti.
Eki kúnge sozylǵan festıvalde etnomádenı birlestikterdiń ókilderi ulttyq qolóner buıymdarynyń kórmesin uıymdastyryp, óz ónerlerin ortaǵa saldy. On ekinshi ret uıymdastyrylǵan dástúrli sharaǵa on úsh etnomádenı birlestiktiń ókilderi qatysty. Jyl saıyn ótetin dostyq festıvalinde elimizdi mekendeıtin etnostar bir-biriniń tarıhymen, jádigerlerimen, salt-dástúrimen tanysyp, etene aralasady. Festıval aıasynda uıymdastyrylǵan kórmede zattary úzdik dep tanylǵan jáne án, bı nomınasııalary boıynsha ádemi óner kórsetken birlestikter jeńimpaz atanady.
Satybaldy SÁÝIRBAI. Aqtóbe oblysy.
AKADEMIKKE QURMET KО́RSETILDI. Jýyrda 80 jyldyq mereıtoıyna oraı Semeıge kórnekti qoǵam qaıratkeri, akademık Tóregeldi Sharmanov kelip ketti. Akademıktiń usynysymen onyń osy sapary barysynda munda taǵamtaný ortalyǵy ashyldy. Onyń syrtynda Semeı memlekettik ýnıversıtetiniń aýlasynda bolashaq ǵylym alleıasynyń irgetasy qalandy. Oblys ákimi Berdibek Saparbaevtyń qoldaýymen sol kúni tús aýa belgili akademık-ǵalymnyń mereıtoıy Abaı atyndaǵy drama teatrynda saltanatty jaǵdaıda atap ótildi.
Dáýlet SEISENULY. Semeı.
QOS AQYN ShYǴARMALARY OQYLDY. Atyraýda mektep oqýshylarynyń on ekinshi ret ótkizilgen Abaı-Shákárim oqýlary márege jetti. Sharaǵa qatysýshylar qos aqynnyń ulaǵatqa toly shyǵarmalaryn «О́leń – sózdiń patshasy, sóz sarasy» atty birinshi bólimde jatqa oqýdan, al «Kóńilim ándi uǵady» dep atalǵan kelesi kezeńde ánderi men kúılerin oryndaýdan saıysqa tústi. Sonymen birge, poezııaǵa yntaly oqýshylar óz óleńderin oqydy. Mektep oqýshylarynyń sóıleý mánerin, jadyda saqtaýyn, oıyn jetkize bilýin jetildirýge sep bolatyn osy sharada A.Názenǵalıeva, D.Jumashev, M.Esenııazov sekildi oqýshylar jeńimpaz atandy.
Joldasbek ShО́PEǴUL. Atyraý oblysy.
JURYNOVTYŃ ESIMIMEN ATALADY. Q.A.Iаsaýı atyndaǵy HQTÝ-diń senat zalyna akademık Murat Jurynovtyń esimi berildi. Munyń óz máni bar. Elbasymyz Túrik memleketiniń basshylarymen kelisip, HQTÝ-di ashýǵa usynys aıtqanda osy oqý ornyn Túrkistannan ashý qajettigin alǵa tartqan tuńǵysh rektory Murat Jurynov bolatyn. Qalanyń qulazyǵan shyǵys betinen alǵashqy qazyǵyn qaqqan da ózi edi. Búginde Iаsaýı atyndaǵy HQTÝ kıeli qalanyń ajaryn ashyp qana qoımaı, Qazaqstandaǵy irgeli oqý oryndarynyń birine aınaldy. Jurtshylyq HQTÝ-diń qazirgi rektory, professor Lesbek Táshimovtiń ónegeli isine rıza boldy. Akademık M.Jurynov alǵysyn bildirdi.
Baqtııar TAIJAN. Ońtústik Qazaqstan oblysy, Túrkistan qalasy.
TIGIN MÁShIŃKESIN TARTÝ ETTI. Múgedek jandardy qamqorlyqqa alǵan «Úmit» qoǵamdyq uıymy janynan, mine, birneshe jyldan beri tigin sehy jumys isteıdi. Onda densaýlyqtaryna baılanysty atalǵan toptaǵy ismer áıelder balalarǵa arnap jeńil kıim túrlerin tigedi. Buǵan deıin olar máshińkelerdi jalǵa alyp, tabystarynyń bir bóligin sol úshin tólep kelse, endi jaǵdaılary jeńildeı tústi. «Kásipkerlikti damytýdyń «Damý» aımaqtyq qory tarapynan tartý etilgen birneshe tehnıka eńbekterin jandandyrýǵa úlken kómek bolyp tıdi. Osyndaı qoldaýdyń arqasynda tigin buıymdarynyń sapasyn jaqsartýmen birge, túr-túrin kóbeıtýge de múmkindik týyp otyr.
Aıqyn NESIPBAI. Qaraǵandy.
BALYQ AÝLAÝǴA TYIYM SALYNDY. О́tken aptada Tobyl-Torǵaı oblysaralyq sý basseıni ınspeksııasy balyqtyń birneshe túrin aýlaýǵa ýaqytsha tyıym saldy. Amangeldi, Jangeldın aýdandary men Arqalyq qalasy tóńiregindegi sý qoımalarynan sáýirdiń 20-synan mamyrdyń aıaǵyna deıin sazan, karp, tyran, qarabalyq aýlanbaıtyn boldy. Al bul tizimge shortan kirmeıdi. Shortan men sazan tuqymdas ıaz balyǵyn oblystyń ózge aımaqtaryndaǵy sýlarda sáýirdiń ortasynan mamyrdyń ortasyna deıin, al karp, tyran, kókserke, ońǵaq balyqtaryn mamyrdyń ortasynan maýsymnyń aıaǵyna deıin aýlaýǵa bolmaıtynyn eskertti. Qalǵan kezderde balyqshylarǵa satyp alǵan joldamamen bes kılogramǵa deıin balyq aýlaýǵa ruqsat bar.
Názıra JÁRIMBETOVA. Qostanaı.
BILIMI MEN BILIGIN TANYTTY. «Úzdik aýyl mektebi» baıqaýy Taldyqorǵan qalasyndaǵy №14 mektep-gımnazııasynda ótti. Baıqaýǵa aýdandyq jarystardan úzdik tanylǵan 18 bilim shańyraǵy qatysyp, baq synady. Ustazdar óz ujymdaryndaǵy jas urpaqqa sapaly bilim, sanaly tárbıe berýdiń san qyrlaryn, ozyq tehnologııany qoldaný, shyǵarmashylyq izdenisterin ashyp kórsetýge umtyldy. Qazylardyń joǵary talǵamynan kóringen Kóksý aýdanyndaǵy qazaq mektep-gımnazııasy «Úzdik aýyl mektebi-2011» ataǵyna ıe boldy. Al, Eńbekshiqazaq aýdanyndaǵy O.Jandosov atyndaǵy orta mektep ekinshi, Aqsý aýdany Qarakemer orta mektebiniń pedagogıkalyq ujymy úshinshi orynnan kórindi.
Kúmisjan BAIJAN. Almaty oblysy.