Dárigerler elde júr

Ýaqyt ozdy, zaman ózgerdi, ómir ósti degen osy shyǵar, kúni keshe kópshilikke  qııaldaı kórinetin ister búginde qalypqy qubylysqa aına­lyp jatyr. Máselen, aýyl adam­da­ry syrqattanyp qalsa, buǵan deıin bir jaǵynan naýqas  qysyp, ekinshi ja­ǵynan jol qınap eriksiz qala ja­ǵalaýshy edi ǵoı. Al endi qara­sańyz,  jaǵdaı kerisinshe. Bilikti dá­ri­gerler jer-jerge olardy ózderi izdep kelip, densaýlyqtaryn tikeleı tekseredi. Bul shara «Salamatty Qazaq­stan» baǵdarlamasy aıasynda júr­gizilýde. Arnaıy qural-qondyrǵy­lar­men jab­dyq­talǵan jáne mamandar­men ja­saq­talǵan oblystyq me­dı­sı­nalyq or­ta­lyqtyń jyljyma­ly dıag­nostı­kalyq kesheni  bıyl aldymen Buqar jyraý aýdanyndaǵy Kókpekti aýy­lynda bol­dy. 15 dári­ger tańerte­ńnen keshke deıin 500-ge jýyq adamdy tekserip úl­gerdi. Ma­ńyndaǵy Baıqadam, Sa­ry­tóbe sha­ǵyn eldi mekenderiniń  tur­ǵyndary da qaraldy. Solardyń biri jas ana Dınara Túgelbaeva «Úsh jasar ulym Bolsynnyń týǵannan jú­rek talmasy bar. Sodan beri jyl sa­ıyn Qaraǵandydaǵy kardıo­lo­gııa­lyq or­talyqqa  aparyp, teksertip júre­min. Qala aýyldan alys. Baryp qaı­týǵa kóligimiz joq. Araǵa eki túnep, balam da, ózim de sharshap-shaldyǵyp qaıtýshy edim. Endi ja­qyn jerden kórsetip alýǵa  múmkin­dik týǵanyna qýanyp qaldym, – dep aıtqanyndaı jergilikti jurttyń  medısınalyq qam­qorlyqtyń atal­ǵan túrine rızalyqtary zor bolyp jatyr. Temirtaý, Jezqazǵan, Balqash qa­lalyq densaýlyq saqtaý oryn­darynda da qurylǵan osyndaı úsh jyljymaly dıagnostıkalyq keshen de taıaý arada  óz aımaq­taryn­daǵy aýyldar arasyna shyqqaly otyr.  Adam densaýlyǵyn qorǵaý, jaqsartý maqsatyndaǵy bul is-shara kúzge deıin jalǵasady. Aıqyn NESIPBAI. Qaraǵandy oblysy.