Atap aıtqanda, ındýstrııaldy-ınnovasııalyq damý baǵdarlamasy aıasynda iske qosylǵan jobalardyń 94 %-y josparlyq qýattylyqty ıgerip, 101 mlrd teńgeniń ónimin óndirgen. Nátıjesinde, onyń óńdeý ónerkásibindegi úlesi 21 %-ǵa ósti.
Budan bólek, óńirde jańa ónim túrlerin óndiretin óndiristik nysandar iske qosyldy. Importtalatyn ónimder – sý nasostary, keromogranıttik plıtalar, kilemder, MDF taqtaılar jáne ózge de taýarlar óńirimizde shyǵarylsa, sement, motor maıy, kilem, mata, dári-dármek, transformatorlardy eksporttaý qolǵa alyndy. Oblysqa 79,4 mlrd teńge ınvestısııa baǵyttalyp, 2016 jyldyń tıisti kezeńinen 2 ese artyp otyr.
Indýstrııaldy-ınnovasııalyq damý memlekettik baǵdarlamasy aıasynda bıyl 37 mlrd teńgege 17 jobany iske qosyp, 900-den astam jumys ornyn qurý josparlanýda. Oblys ónerkásibi óniminiń kólemin 850 mlrd teńgege jetkizý, ıaǵnı, shaǵyn jáne orta kásipkerlik sýbektileri óndirgen ónim kólemin 900 mlrd teńgege deıin ulǵaıtý kózdelýde.
Aýyl sharýashylyǵyn ekonomıkanyń jańa draıverine aınaldyrý jumystary qarqyndy júrip jatyr. Máselen, osy jyly egistik kólemi 792,5 myń ga jetkizilip, ıntensıvti baý aýmaǵy aǵymdaǵy jyly 1 500 ga ulǵaıtylady. Sonymen birge, 300 ga jerge jańǵaq, 200 ga badam baýlaryn otyrǵyzý josparlanýda. Jylyjaılar alańy 1 323 ga qurasa, 3 013 birlik shaǵyn mal bordaqylaý alańy, 722 januıalyq sút ferma, 14 shaǵyn qus fermasy, 4 birlik balyq sharýashylyǵy ashylady degen boljam bar.
Shymkent qalasyn úshinshi iri megapolıske aınaldyrý jumystarynyń barysy da aıtarlyqtaı. Búgingi tańda shaharda 19 kópqabatty úıdiń, 1 200 oryndy mekteptiń jáne basqa da nysandardyń qurylysy júrgizilip jatyr.
«Shymkent City» jobasy bastalyp, onda ınjenerlik-kommýnıkasııalyq júıeler men joldardyń, 10 kópqabatty turǵyn úıdiń, 49 ga saıabaqtyń qurylysy júrgizilýde. Sonymen qatar, Shymkentti jasyl qala mártebesine aınaldyrý maqsatynda «Shatqaldar» jobasy boıynsha 141 ga aýmaq anyqtalyp, 5 qoǵamdyq demalys orny ashylmaq. Al turǵyn úı qurylysyn damytý maqsatynda «Nurly jer» baǵdarlamasy aıasynda 700 myń sharshy metrdi quraıtyn 8 052 páter paıdalanýǵa beriledi.
Salyq túsimine kelsek, 2017 jyldyń 3 aıynda memlekettik bıýdjetke túsken salyqtar men basqa túsimderdiń kólemi 72,3 mlrd teńgeni qurap, jospardan 12,4%, ótken jyldyń tıisti kezeńinen 12,3% artty. Jergilikti bıýdjetke 27,4 mlrd teńge túsip, jospardan 14,4% jáne ótken jyldyń tıisti kezeńinen 7,3% artty.
Jumyssyzdyq deńgeıin tómendetý, kásipkerlikti qoldaý maqsatynda 21 192 adamǵa áleýmettik qoldaý sharalary kórsetilip, jalpy 3 330 jumys orny quryldy. Kásipkerlikti damytýǵa usynylatyn shaǵyn nesıe kólemi 2 ese kóbeıdi.