Memleket basshysy ótken kezdesýden beri eki el arasyndaǵy iskerlik belsendiliktiń artýy baıqalyp otyrǵanyn atap ótti, dep habarlaıdy Aqordanyń resmı saıty.
– Bıylǵy birinshi toqsanda ekonomıkanyń túrli salasyndaǵy iskerlik ózara qarym-qatynastyń deńgeıi artty. Osy oraıda, kólik-logıstıka salasyn, avtoónerkásipti, sondaı-aq óńirlik yntymaqtastyqty atap ótýge bolady. 2017 jylǵy alǵashqy úsh aıda taýar aınalymy 37%-ǵa ósti, – dedi Qazaqstan Prezıdenti.
Sh.Mırzııoev tyǵyz ekijaqty kezdesýler memleketaralyq qarym-qatynastyń tıimdiligine tikeleı yqpal etip otyrǵanyna nazar aýdardy.
– Bıylǵy naýryz aıyndaǵy sapardan soń biz birlesken jumystardyń barlyq baǵyty boıynsha jol kartasyn qabyldadyq. Mınıstrler, óńirler basshylary deńgeıindegi kezdesýler jıiledi, – dedi ózbek kóshbasshysy.
Budan bólek, О́zbekstan Prezıdenti Reseı Federasııasynan munaı tasymaldaý máselesine baılanysty qoldaý kórsetkeni úshin Nursultan Nazarbaevqa alǵys aıtty.
Sońynda eki el basshylary Qazaqstan men О́zbekstan arasyndaǵy yntymaqtastyqtyń oń qarqyny saqtalyp, odan ári damı beretinine senim bildirdi.