Agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasyn ázirleý sátinen bastap quzyrly mınıstrlik aýylsharýashylyq ónimin óndirýshilermen de, qaıta óńdeýshilermen de ózara tyǵyz baılanysta ekenin atap ótken jón. Endeshe, joǵarydaǵy qujatqa qol qoıý atalǵan baǵdarlamany odan ári iske asyrýǵa jańa serpin berip, aýyl turǵyndarynyń áleýmettik-ekonomıkalyq jaǵdaıyn jaqsartady.
«Qujat aıasynda Qazaqstannyń agrarlyq sektorynyń úlken áleýetin eskere otyryp, otandyq ónimniń básekege qabilettiligin jaqsartýǵa, óndirisin arttyrýǵa jáne syrtqy naryqqa shyǵýyna yqpal etetin bolamyz», dedi jıynda vıse-premer.
Basqosýda «Atameken» ulttyq kásipkerler palatasy tóralqa tóraǵasy T.Qulybaev qol qoıylǵan kelisim qos tarap jumysyn úılestirýdi nyǵaıtý úshin negiz quraıtyndyǵyn atap ótti. Onyń aıtýynsha, bastama agroónerkásiptik keshendi damytý salasyndaǵy zańnamalyq bazany jetildirý boıynsha biryńǵaı kelisilgen usynystardy ázirleýge, ónim jáne shıkizat eksporty men ımporty máselelerinde ustanym qalyptastyrýǵa, aýylsharýashylyq ónimin tikeleı ótkizý júıesin damytýǵa múmkindik beredi.
Shara barysynda agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasy týraly aýqymdy baıandama jasalyp, qujattyń jańalyqtary men artyqshylyqtary aıtyldy. Kelisim aıasynda AО́K sýbektilerin memlekettik qoldaý ádis-tásilderi men quraldaryn jetildirý, shaǵyn jáne orta fermerlerdi oqytý baǵdarlamasyn iske asyrý, tehnıkalyq bazany damytý kózdelgen. Sonymen qatar, jıynda sý tasqynynan zardap shekken óńirler jaǵdaıy da sóz boldy.
Jıynda taraptar memlekettik baǵdarlamany iske asyrý jónindegi qyryqtan astam is-sharadan turatyn birlesken josparǵa qol qoıdy.
Ashat RAIQUL,
«Egemen Qazaqstan»