Juldyzyń jana bersin, Tolǵanaı!

Atalmysh olımpıadada alǵyr­lyǵymen top jar­ǵan­dardyń qata­­rynda №38 «Shat­tyq» bala­baqshasynyń tár­bıe­lenýshisi Tol­ǵanaı Esil­baı da bar. Osy ba­labaq­­shanyń meń­gerýshisi Sáýle Nur­ǵa­lı­qyzynyń aıtýynsha, irik­teý týrynan ótken Tolǵanaı endi qa­­lalyq olım­pıadaǵa ázir­lenip jatyr.

– Ár jyl saıyn bilim bas­qarmasy uıymdastyratyn «Ja­ńa jyl juldyzdary» atty respýb­lıkalyq balalar bı baıqaýynda bizdiń búldir­shin­derimiz 1-oryn dıplomymen birneshe ret marapattaldy. «Shaǵala» tobynyń tárbıelenýshisi Tolǵanaı Dýman­qyzy ánshilik ónerimen de kórer­menderdi tánti etip keledi. Jýyrda «Qylyqty qyz – qundyz, ulyqty ul – juldyz» atty qalalyq qyz synyna qatysyp, «Shattyq arýy» ataǵyna ıe boldy. Sondaı-aq, Qazaq radıosyna 95 jyl, «Shal­qar» radıosyna 50 jyl tolýyna oraı «Shalqar» radıosy uıym­dastyrǵan respýblıkalyq án baıqaýynda «Týǵan jer» áni­men jeńiske jetip, kelesi týrǵa Al­maty qalasyna baryp júldeli oraldy. Tolǵanaı sııaqty daryndy balalardyń arqasynda bala­­baqshamyzdyń búginde reı­tıngi joǵary, – deıdi Sáýle Nur­ǵalıqyzy.

Tórt jasynan bastap Asta­nadaǵy Oqýshylar saraıynda Sáý­le Andybaeva syndy bilikti mamannan án boıynsha dáris alyp, ónerin shyńdaǵan daryndy balaqaı ustazdarynyń úmitin árdaıym aq­taýmen keledi. Balalarǵa arnal­ǵan kóptegen shyǵarmashylyq festıvaldarda júldeger atanyp júr. Atap aıtsaq, mektepke deıingi balalyq shaq respýblıkalyq ortalyǵy uıymdastyrǵan «Uly dala urpaqtary» atty qalalyq baıqaýda «Jeztańdaı ánshi» atalymy boıynsha bas júlde alsa, el táýelsizdiginiń mereıtoıyna arnalǵan I Respýblıkalyq «Jas daryn» óner baıqaýynda Gran-prıge ıe bolyp, Prezıdenttik shyrshaǵa joldamany jeńip aldy. «Aq kógershin», IV qalalyq «Talant jáne sulýlyq saıysy – Astana 2016» baıqaýyna qatysyp, II dárejeli laýreat atandy. «Astana shýaqtary» atty balalar shyǵar­mashylyǵy festıvalinen 2-oryn alyp, dıplommen marapattaldy.

Baldyrǵandardyń daryny men qarym-qabiletin shyńdap, tabıǵı talantyn óristetý tárbıeshiniń bilim-biligine baılanysty ekeni daýsyz. Osy oraıda, Tolǵanaıdy ónerge baýlyp júrgen tárbıeshi Aıjan Kárimovanyń eńbegi erekshe ekenin aıta ketsek artyq bolmas.

Erkin eldiń erteńin tárbıeleý balabaqshadan bastaý alady emes pe. Ulttyq tárbıeniń tálimin bo­ıy­na darytqan Tolǵanaılardyń bıik óresi arqyly Qazaq eliniń mártebesi de asqaqtaı túsetini anyq. Endeshe, juldyzyń jana bersin, Tolǵanaı degimiz keledi.

Aıa О́MIRTAI,

«Egemen Qazaqstan»