Pavlodarda jaıaý júrginshiler ótkelinde 13 jastaǵy jasóspirim qaza tapty. Qaıǵyly oqıǵa 6 aqpan kúni keshke «Iаblonka» baý-baqshasynyń aýmaǵynda boldy. Joldan ótip bara jatqan jetkinshekti kólik qaǵyp ketken, dep jazady Egemen.kz.
Marqumnyń aty-jóni – Ámir Jambyl. Qazir balanyń týystary oqıǵa kýágerlerin izdep jatyr. Olardyń aıtýynsha, bir kólik toqtap, balany ótkizip jibergenimen, artqy jaqtan kelgen krossover toqtamaı soqqan.
«Júrgizýshi ustaldy. Biraq biz istiń barlyq mán-jaıy anyqtalǵanyn qalaımyz. Kameradaǵy jazbalar shyndyqty ashýǵa kómektesýi múmkin», deıdi jaqyndary.
Oqıǵa ornynda bolǵan óńirlik bala quqyqtary jónindegi ýákil Sáýle Shákeneva bul aýmaqtyń burynnan qaýipti ekenin aıtty. Atalǵan jol – respýblıkalyq mańyzdaǵy tasjoldyń bóligi. Turǵyndar munda kólikter toqtamaı ótetinin, al jaıaý júrginshilerdiń ómiri kún saıyn qaterge tigilip jatqanyn jetkizdi.
Jol-kólik oqıǵasyn azaıtýdyń bir sharasy
«Jol boıyndaǵy qorshaýlar júrgizýshilerge bul jerdi jyldam júretin tasjol sııaqty kórsetedi. Jaıaý júrginshi ótkeli bar ekenin elemeıtinder kóp. Kameralar aıyppul salǵanymen, adam ómirin qorǵaı almaı otyr. Bizge batyrmasy bar baǵdarsham qajet», deıdi turǵyndar.
Bul aýmaqta 500-ge jýyq úı bar, júzden astam bala kún saıyn osy joldy kesip ótedi. Jergilikti halyq birneshe ret jaýapty mekemelerge júgingenin, biraq másele sóz júzinde qalyp otyrǵanyn aıtady.
«Munda eresek adamnyń ózi qaýiptenedi. Al bala úshin bul ótkel – naǵyz qater. Baǵdarsham qoıylmaıynsha, mundaı jaǵdaı qaıtalana beredi», dedi Sáýle Shákeneva.
Ol osy máseleni sheshý jóninde Hasar Habylbekovke úndeý joldaǵan.
Ámir Jambyl kópbalaly otbasyndaǵy kenje bala edi. Ony kólik úıine jaqyn jerde qaǵyp ketken. Polısııa bul derek boıynsha qylmystyq is qozǵady. Aldyn ala málimetke sáıkes, Jac markaly kóliktiń júrgizýshisi balany qaǵyp ketken. Jasóspirim alǵan jaraqatynan aýrýhanada kóz jumdy.
Qazaqstanda baǵdarsham tártibi ózgeredi: neni bilý kerek?
Qazirgi tańda kólik arnaıy turaqqa qoıylyp, oqıǵanyń sebepteri anyqtalyp jatyr. Turǵyndar bolsa, kezekti ýáde emes, naqty sheshim qajet ekenin aıtyp otyr.
Budan eki aı buryn dál osy Pavlodarda eki júrgizýshi jol-kólik apatynan kóz jumǵanyn jazǵan edik.