Aqtóbede tary daqylyn ósirýdi dáripteýge arnalǵan «Aqtóbe – tarynyń astanasy» gastrofestıvali ótti, dep habarlaıdy Egemen.kz.
Is-sharaǵa Aqtóbe oblysynyń ákimi Ashat Shaharov qatysyp, festıvaldiń kórme alańdaryn aralady. Sondaı-aq ulttyq dástúrlerdi saqtaý men óńirde gastronomııalyq týrızmdi damytýdyń mańyzdylyǵyna toqtaldy.
Aýqymdy sharaǵa qala turǵyndary men qonaqtary kóptep jınalyp, óńirdiń baı mádenı jáne gastronomııalyq murasyn tanytatyn jarqyn alańǵa aınaldy.
Tarydan daıyndalǵan elýge jýyq taǵam túri usynylǵan kórme-jármeńke festıval qonaqtarynyń erekshe qyzyǵýshylyǵyn týdyrdy. Qatysýshylar ulttyq taǵamdardyń alýan túrimen tanysyp, shokoladty jent ázirleý boıynsha sheberlik sabaǵyna qatysyp, dástúrli baýyrsaq pen samaýrynnan quıylǵan shaıdan dám tatty.
Kópshiliktiń nazary Oıyl aýdanynyń arnaıy alańyna tústi. Munda tary ósirý jáne óńdeý tarıhyna arnalǵan eksponattar qoıylyp, dándi daqyldy dástúrli tásilmen daıyndaý úderisi kórsetildi. Kelýshiler ataqty taryshy Shyǵanaq Bersıevtiń aýyl sharýashylyǵyn damytýǵa qosqan úlesi týraly keńirek málimet alyp, osy daqylǵa qatysty ulttyq dástúrlerdiń erekshelikterimen tanysty.
Qazaqy taǵamnyń qasıeti
Festıval aýmaǵynda halyq sheberleriniń qolóner buıymdary kórmesi de uıymdastyryldy. Qonaqtar teriden, kıizden, aǵashtan jáne júnnen jasalǵan avtorlyq jumystardy tamashalap, zergerlik óner týyndylarymen tanysty.
Gastrofestıval aıasyndaǵy mańyzdy is-sharalardyń biri aýyl sharýashylyǵy salasynyń mamandaryn, agronomdardy, qoǵam ókilderin jáne sarapshylardy biriktirgen «Aqtóbe – tarynyń astanasy» atty dóńgelek ústel boldy. Kezdesý barysynda tary ósirý dástúrin jańǵyrtý, onyń paıdaly qasıetteri, sondaı-aq óńirdiń agrarlyq jáne gastronomııalyq áleýetin damytý perspektıvalary talqylandy.
Elimizde ulttyq murany damytýǵa erekshe den qoıylyp keledi. Eske sala keteıik, buǵan deıin Semeıde tazylar baıqaýy ótken bolatyn.