Qazaqstanda balalardyń qosymsha bilim alýyna, shyǵarmashylyq damýyna jáne sportpen shuǵyldanýyna qoljetimdilik artqan. Elimizde balalardyń 90 paıyzǵa jýyǵy túrli úıirmeler men seksııalarǵa barady, dep habarlaıdy Egemen.kz.
2025 jyldan bastap qosymsha elimizde bilim berýdi vaýcherlik qarjylandyrýdyń biryńǵaı júıesi kezeń-kezeńimen engizilýde. Búgingi tańda sport, shyǵarmashylyq jáne qosymsha bilim berý baǵyttary boıynsha 600 myńnan astam bala vaýcher ıelengen. Bul júıe qarjylandyrýdy ár balaǵa bekitip, memlekettik qoldaýdan aıyrylmaı-aq bilim jáne sport baǵdarlamalaryn erkin tańdaýǵa múmkindik beredi. Mınıstrlik málimetine sáıkes, elimizdegi balalardyń shamamen 90 paıyzy túrli úıirmeler men seksııalarǵa qamtylǵan.
Balalar sportyna 74 mlrd teńge bólinedi
Búginde elde 1,8 mln-ǵa jýyq bala turaqty túrde dene shynyqtyrý jáne sportpen aınalysady, bul jalpy balalar sanynyń 34,6 paıyzyn quraıdy. 2029 jylǵa deıin bul kórsetkishti 45 paıyzǵa jetkizý josparlanǵan.
Negizgi basymdyq balalardyń sport seksııalaryna, ınfraqurylymǵa jáne bilikti jattyqtyrýshylarǵa qoljetimdiligin keńeıtýge berilip otyr. Osy baǵytta balalar-jasóspirimder sport mektepterin qarjylandyrý júıesi reformalanýda. 2026 jyldan bastap jan basyna normatıvtik qarjylandyrý engiziledi, bul rette qarajat árbir tárbıelenýshige bólinetin bolady.
Ortasha qarjylandyrý kólemi bir sportshyǵa shaqqanda 233 myń teńgeden 415 myń teńgege deıin ulǵaıtyldy. Sonymen qatar biliktilik testileýinen ótken jattyqtyrýshy-oqytýshylardyń jalaqysyn 30 paıyzǵa arttyrý kózdelgen.
Mınıstrlik: Balalar sportyn qarjylandyrý kólemi eki esege jýyq artady
2026-2028 jyldary reformany iske asyrýǵa 74 mlrd teńge bólinip, qarajat materıaldyq-tehnıkalyq bazany nyǵaıtýǵa, jarystarǵa qatysýǵa, oqý-jattyǵý jıyndaryn uıymdastyrýǵa jáne sporttyq daıyndyq sapasyn arttyrýǵa baǵyttalmaq.
Elimizdiń barlyq óńirinde ınklıýzıvti sport ortalyqtary ashylady
2025 jyldyń qorytyndysy boıynsha Qazaqstanda 743 myńnan astam múgedektigi bar adam tirkelgen, olardyń ishinde 100 myńnan astamy – balalar.
Elde paralımpıadalyq jáne sýrdlımpıadalyq sport túrleri júıeli túrde damyp keledi. Memleket bul baǵytqa jan-jaqty qoldaý kórsetip otyr – qabyldanǵan zańnamalyq ózgerister nátıjesinde parasportty damytýǵa basymdyq berilip, sportshylardy qoldaý sharalary keńeıtilip, óńirlerde sporttyq qyzmetterdiń qoljetimdiligi artyp keledi.
Aldaǵy jyldary elimizdiń barlyq óńirlerinde ınklıýzıvti sport ortalyqtaryn ashý josparlanǵan. Sonymen qatar, balalardy qoldaýǵa jáne olardy sporttyq ómirge beıimdeýge baǵyttalǵan ulttyq ınklıýzıvti «Juldyzaı» oıyndary turaqty túrde ótkizilip keledi.
Eske sala keteıik, jýyrda Prezıdent Qasym-Jomart Toqaev týrıstik sala men balalar sportyn qoldaý týraly zańǵa qol qoıdy.