Memleket basshysynyń tapsyrmasyna sáıkes elimizde «Keleshek mektepteri» ulttyq jobasy júzege asyrylyp jatyr, dep habarlaıdy Egemen.kz.
2023-2025 jyldar aralyǵynda joba aıasynda 460 myńnan astam oqýshy ornyna arnalǵan 217 mektep paıdalanýǵa berildi. Bul mektepterdegi oryn tapshylyǵyn azaıtýǵa, qoldanystaǵy bilim berý uıymdaryndaǵy júktemeni tómendetýge jáne oqýshylar úshin zamanaýı jaǵdaı jasaýǵa múmkindik berdi. 2026 jyldyń mamyr aıyndaǵy málimetke sáıkes, jańa mektepterde 220 myńnan astam oqýshy bilim alyp, shamamen 16 myń pedagog jumys istep jatyr.
217 mekteptiń 84-i aýyldyq jerlerde salynǵan, bul qala men aýyl mektepteri arasyndaǵy alshaqtyqty azaıtýǵa yqpal etedi. Jańa bilim berý nysandarynyń aýmaǵy standartty ǵımarattarmen salystyrǵanda 15-20 paıyzǵa úlken, al tehnıkalyq jabdyqtalý deńgeıi tórt ese joǵary.
Sonymen qatar jańa mektepterge kadrlyq rezerv qalyptastyrý jumystary júrgizilýde. 2026 jyly «О́rleý» ulttyq biliktilikti arttyrý ortalyǵy 18 óńirdegi 19 pedagogıkalyq joǵary oqý ornymen birlesip jas mamandardy irikteý jáne súıemeldeý jumystaryn atqaryp jatyr. Baıqaýǵa ortasha GPA kórsetkishi 3,33-ten joǵary 2 myńnan astam úmitker qatysqan.
Jobada balalardyń qaýipsizdigine, ınklıýzıvti orta qalyptastyrýǵa jáne tárbıe jumysyna erekshe kóńil bólingen. Mektepter beınebaqylaý júıelerimen, jedel basqarý ortalyqtaryna qosylǵan qaýipsizdik tetikterimen, dabyl túımelerimen, avtomatty esik buǵattaý júıelerimen jáne lısenzııalanǵan kúzetpen jabdyqtalǵan.
Erekshe bilim berý qajettilikteri bar balalar úshin arnaıy kabınetter men kedergisiz orta jasalyp, psıholog, logoped jáne defektolog mamandary qyzmet kórsetedi. Tárbıe jumysy «Adal azamat» qaǵıdaty negizinde júrgiziledi.
Eske sala keteıik, jýyrda «Keleshek mektepteri» oqýshylary arasynda fýtzaldan respýblıkalyq týrnır ótken bolatyn.