Qazaq kúresinde kúni búginge deıin as pen toıda avtokólik, qomaqty qarajat, tórt túlik mal sekildi júldeler kóbine eresekter arasyndaǵy jarystarǵa tigilip kelgeni belgili. Ásirese bas júldege temir tulpar tigilgen dodalarǵa negizinen úlken balýandar qatysatyn. Al jas balýandar arasyndaǵy jarystarda qarjylaı syıaqy bolǵanymen, avtokólik sekildi iri júldeniń buıyrýy sırek kezdesedi.
Jaqynda Túrkistan oblysynyń Otyrar aýdanyna qarasty Qoǵam aýylynyń 5-synyp oqýshysy Qasymjomart Muhıtuly qazaq kúresinen halyqaralyq týrnırde chempıon atandy. Sozaq aýdanynda ótken saıysta 10 jastaǵy talant óz salmaǵynda qarsylastarynyń bárin qoǵadaı japyryp, bas júldege tigilgen «Mersedes» avtokóligin jeńip aldy. Balǵyn balýannyń ákesi de, atasy da kúres ónerin serik etken jandar. Atasy Aıtjan Dodabaev – qazaq kúresi men sambodan sport sheberi, respýblıkalyq jáne halyqaralyq dodalardyń júldegeri. Ákesi Muhıt Dodabaev ta bul ónerden kende emes, bala kúninen kúrespen shuǵyldanyp, túrli jarysqa qatysqan tájirıbeli sportshy.
Sóıtip, atanyń jolyn nemere jalǵap, balýandar áýletiniń dástúri úzilmeı keledi. Balǵyn sportshynyń armany da asqaq – ol bolashaqta Olımpıada chempıony bolýdy maqsat etedi.
Úsh jyl buryn Otyrar aýdanynyń Qoǵam aýylynda sport ardageri, rýhanııat janashyry Ońalbek Áýelbekovtiń bastamasymen jáne demeýshiligimen zamanaýı sport kesheni boı kótergen bolatyn. Sol ýaqyttan beri bul berekeli ordadan talaı talantty jas túlep ushty. Halyqaralyq dodalarda top jaryp júrgen daryndy býynnyń qatarynda Qasymjomart ta bar. Bapkerleri Abylaıhan О́skenbaı men Býrahan Jumageldıev jattyqtyratyn jas balýan eńbek pen tabandylyq qana bıik belesterge bastaıtynyn jaqsy túsinedi.
«Kindik qanym tamǵan Qoǵam aýylynda sport keshenin salý týraly bastama kótergende, osyndaı órender ósip shyqsa degen armanym bolǵan edi. Shúkir, búginde saıdyń tasyndaı iriktelgen, tegeýrini myqty balalar ósip keledi. El sportynyń bolashaǵy – osy keıingi býynnyń qolynda. Bul balanyń atasy kezinde qazaq kúresiniń álippesin ózimnen úırengen, óte qarýly, qaısar balýan edi. Nemeresi de sol atasyna tartqan sııaqty. Qajymuqan babamyzdyń jolyn bersin, álem jáne Olımpıada chempıony bolsyn. Ata-analarǵa aıtarym: eger ul-qyzdaryńyz qyrandaı qyraǵy, suńqardaı ór, arystandaı aıbatty bolyp óssin deseńiz, sportqa baýlyńyz», deıdi O.Áýelbekov.
Qasymjomart jazǵy demalys kezinde de ýaqytyn bos ótkizbeı, jattyǵýyn úzbeı jalǵastyryp keledi. Alda turǵan bási joǵary, júldesi qomaqty týrnırlerde de ol óz namysyn qoldan bermeýge bar kúshin salmaq.