31 mamyrdan bastap LOT Polish Airlines Polsha ulttyq áýe tasymaldaýshysy Almaty – Varshava baǵyty boıynsha tikeleı reısterdi iske qosady. Bul týraly Almaty qalasy ákimdiginiń baspasóz qyzmeti málimdedi, dep habarlaıdy Egemen.kz.
Reıster zamanaýı Boeing 737 MAX áýe kemelerimen aptasyna tórt ret oryndalady. Bul Qazaqstan men Eýropa arasyndaǵy qatynasty odan ári qolaıly ári yńǵaıly etýge múmkindik beredi.
«Almaty halyqaralyq týrıstik jáne iskerlik hab retindegi mártebesin nyǵaıtýdy jalǵastyryp keledi. Endi megapolıs turǵyndary men qonaqtary Polsha astanasy Varshavaǵa tikeleı usha alady», delingen habarlamada.
Sondaı-aq 1 maýsym kúni Almatyǵa polshalyq týroperatorlar men trevel-blogerlerden quralǵan delegasııa keledi. Qonaqtar úshin qalanyń basty kórikti jerleri, zamanaýı týrıstik ınfraqurylymy, gastronomııalyq oryndary jáne Ile Alataýyndaǵy demalys aımaqtaryn qamtıtyn arnaıy baǵdarlama ázirlengen.
Budan bólek, Polsha týrıstik ındýstrııasynyń ókilderi almatylyq týroperatorlarmen jáne bıznes qaýymdastyq múshelerimen kezdesip, birlesken jobalar men bolashaq yntymaqtastyq múmkindikterin talqylaıdy.