Budan buryn Ázerbaıjan men Armenııanyń memleket basshylary I.Álıev pen S.Sargsıan Reseı Prezıdenti D.Medvedevtiń qatysýymen Qazan qalasynda kezdesetin boldy dep habarlanǵan edi. Taýly Qarabaq kıkiljińin beıbit jolmen retteýdiń negizgi qaǵıdattary týraly kelisim bolar dep úmittengen sol kezdesý nátıjesiz aıaqtaldy.
Kezdesýden shyqqan soń eki tarap ta beıbit kelisimge baspady dep qarsy jaqty aıyptady. Sonyń ishinde Ázerbaıjan Prezıdenti I.Álıev óz eliniń áskerı bıýdjeti búgingiden de arttyrylyp, aýmaqtyq tutastyǵyn qalpyna keltirý baǵytyndaǵy talpynystar jalǵasa beretinin málimdedi. «Bizdiń áskerı bıýdjetimiz Armenııanyń osy baǵyttaǵy shyǵynynan 10 ese kóp, men elimizdiń aýmaqtyq tutastyǵy kez kelgen jolmen qalpyna keletinine senimdimin», dedi ol.
Polkovnık 25 jylǵa sottaldy
Reseıde AQSh-qa memlekettik qupııany satty dep aıyptalǵan polkovnık A.Poteevke sot bolyp, ol syrttaı 25 jylǵa bas erkinen aıyryldy. Satqynnyń ózi áshkerelenbes buryn, byltyr maýsym aıynda AQSh-qa qashyp ketken edi.
A.Poteev Reseı Federasııasy syrtqy barlaý qyzmetiniń amerıkalyq sektorynda basshy bolyp istegen. Demek, ol Reseıdiń AQSh-qa shpıondyq áreketteriniń bárin de jaqsy biledi. Reseıdiń AQSh-taǵy kóptegen shpıondary áshkere bolǵan soń satqyndy izdeý bastalǵan. Biraq ony tabý qıyndyqqa túspedi. О́ıtkeni A.Poteev aldymen otbasyn, sodan keıin ózi AQSh-qa qonys aýdarǵan. Osynyń ózi-aq satqynnyń kim ekenin tanytyp bergen.
Áskerı jattyǵý on kúnge sozylady
Iranda on kúnge sozylatyn áskerı jattyǵý bastaldy. «Uly paıǵambar – 6» dep atalǵan bul jattyǵýda Irannyń barlyq áskerı qýaty kórinip, onda jaqyn, orta jáne alys qashyqtyqtarǵa jetetin zymyrandar synaqtan ótkiziledi. Jattyǵýlarǵa basshylyq etetin general A.Hadjızadeniń aıtýyna qaraǵanda, bul «aımaqtaǵy basqa elderge degen Irannyń beıbitshilik jáne dostyq sálemi» bolmaq.
Mundaı jattyǵýlar Iranda buryn da bolǵan. Ol aımaqtaǵy elderdi ǵana emes, Batys elderin de qaýiptendirgen. О́ıtkeni, olar Irannyń ıadrolyq qarýy bolýy múmkin degen kúdikten arylmaı otyr. Tehrannyń qarýynyń qaharynan qatty qorqatyn el – Izraıl. Olar Mahmud Ahmadınejadtyń «bul eldi álemdik kartadan óshirip tastaý kerek» degen úndeýin umyta almaı keledi.
Saıası partııalar saýsaǵyn búgip otyr
Grýzııada saılaýǵa túsetin saıası partııalar bes paıyzdyq «tabaldyryqtan» ótetin bolsa, ózderiniń shyǵyndaryn jabý úshin 600 myń dollardan alatyn bolypty. Bul týraly úkimettiń jańadan ázirlengen zań jobasynda aıtylǵan.
Sonymen birge, jańa zań jobasynda Parlament depýtattarynyń sanyn 150-den 190-ǵa deıin arttyrý kózdelgen. Onyń 83-i majorıtarlyq júıemen, al 107-si bir mandattyq okrýgterden saılanady. Al oppozısııa depýtattardyń úshten ekisi proporsıonaldy júıemen saılanǵanyn qalaýda. Qalaı dese de, jańa zań jobasy burynǵyǵa qaraǵanda, demokratııalyq baǵytta kóp ilgerileýdi kórsetip otyr dedi oppozısııalyq partııa basshylarynyń biri.
Saýdagerler ereýilge shyqty
О́zbekstannyń Samarqand qalasynda eski bazarlardyń birin jabýǵa baılanysty saýdagerler polısııamen qaqtyǵysyp qaldy. Jergilikti bıliktiń onyń ornyna ashqan jańa bazary burynǵydan jeti shaqyrym alys mekende. Onyń ústine saýda ornyn jaldaý da ulǵaıtylǵan.
Endi saýdagerler 3h2 metr bolatyn saýda aýmaǵy úshin edáýir qarjy tólemek. Bul ózbek saýdagerleriniń qaltasy kótere almaıtyn qarajat. Sondyqtan satýshylar burynǵy orynnan ketpeı, saýdalaryn jalǵastyra bergen. Olardy qýýǵa kelgen polısııa sol jerde qatty qarsylyqqa ushyraǵan. Is nasyrǵa shaýyp, ondaǵan saýdager qamaýǵa alyndy. Biraq qarsylyq kelesi kúni de qaıtalandy. Ázirge máseleniń sheshilý shegi kórinbeıdi.
Oppozısııanyń qoltyǵyna sý búrkýshi kim?
Belarýs teledıdary da Prezıdent A.Lýkashenkodan qalmaı, synı sózderdi sýdaı aǵyltatyn boldy. Jeksenbi kúni memlekettik teledıdardyń júrgizýshisi Brest qamalynda bolǵan Uly Otan soǵysynyń 70 jyldyǵyna arnalǵan sharalarǵa Reseı Prezıdenti D.Medvedevtiń kelmegenin qatty synady.
Al Belarýs Prezıdenti A.Lýkashenkonyń dál osy kúnge Máskeýge shaqyrylǵanyn «aqymaqshylyq» jáne «kólgirsýlik» dep qatty ketken. Reseıdiń «Birinshi arnasy» da osy kúni Brestegi sharalardy emes, Mınskidegi oppozısııanyń qarsylyq aksııasyn túsirýdi durys dep tapqan. Belarýs arnasynyń tilshisi osy derekterdi aıta kelip, Máskeýdiń Belorýssııadaǵy oppozısııany qoltyqtan demep otyrǵanyn aıtyp saldy.
Qysqa qaıyryp aıtqanda:
* Fransııa Prezıdenti N.Sarkozı Grekııany bankrottyqtan qutqarýdyń jańa jolyn usyndy. Fransýz bankteri prezıdenttiń qaryzdardy 30 jyl boıy óteıtin oblıgasııamen aýystyrý týraly ıdeıasyn qazirdiń ózinde qoldap otyr.
* Bangladeshte 2009 jyly kóterilis jasaǵan áskerılerge sot boldy. Aıyptylar oryndyǵynda otyrǵan 666 adamnyń toǵyzy aqtalyp, 657-siniń árqaısysyna 7 jylǵa deıin merzim kesildi.
* Arızona shtatynda alty adamdy atyp óltirip, kongressmendi jaralaǵan 22 jasar Lı Lofner júıke aýrýlarynan eriksiz emdeletin aýrýhanaǵa jiberildi.
* Italııanyń Týrın qalasynyń mańynda sol mekende turatyn turǵyndar Sýzaǵa tartylǵan temir jol telimin salýǵa qarsy ereýilge shyǵyp, polısııamen qaqtyǵysyp qaldy. Ereýilge kem degende 2 myńdaı adam qatysqan.
* AQSh-tyń Pensılvanııa shtatynda balalardy demalys lagerine apara jatqan avtobýs jeńil kólikke soqtyǵysyp, apat oryn aldy. Avtobýstaǵy balalar aýrýhanaǵa jetkizilgen. Jol-kólik oqıǵasyna qarsy jolǵa shyǵyp ketken jeńil máshıneniń júrgizýshisi kináli dep tabyldy.
Internet materıaldary negizinde ázirlendi.