Túbi tesik kemeden tyshqan da qashady

Biri qosylyp, biri ajyrap jat­qan saıası uıymdardyń tirligine qazir eshkim tańdanbaıdy. Ol da qalypty qubylysqa aı­nal­dy. Ásirese, saıası básekeniń jeli tu­ra bastaǵanda ánsheıinde buı­yǵy ómir súretin bizdiń uı­ym­dar asa bir belsendilik ta­nytady. Bilegin sybanyp, belin sheship shyǵa keledi. Sońǵy kezderi mundaı belsendilik Qazaq­stan­nyń Kommýnıstik partııasy men tirkelmegen «Al­ǵa» partııa­larynyń tarapy­nan baıqalady. Ekeýi birigip «Ha­lyq maıdany» deıtin uıym qu­ryp jatyr ma, birdeńesi bar. Uıym qurmasyn deıtin eshkim joq. Degenmen, ony óz ara­synda kelisip, múshelerimen ke­ńe­sip qurý kerek emes pe? Eki adam kezdesip, bir uıym qurýǵa bola ma? Osy «Halyq maı­da­ny­na» kúmán­men qaraıtyndar kóp. О́zge túgili, óz músheleri de na­ra­zy. Nara­zy­lyǵy sol, tipti, qaı­bir músheleri partııany tastap shyǵyp jatyr. Ashyq qarsylyq­taryn bildirip, málimdeme jasaýda. Sondaı jaǵ­daı Qyzylorda oblysynyń Ja­laǵash aýdanynda boldy. Qazaqstan Kommýnıstik par­tııasynyń ıdeıasyna sengen, óz erikterimen uıymǵa múshelikke engen, saıası báseke kezinde belsendi bolǵan 25 adam atalǵan partııanyń músheliginen shyqty. Sebep – Qa­zaqstan Kommýnıstik partııasy­nyń tirkelmegen uıym­men tize qosýy. Tirkelmegen par­tııanyń ar­tynda kimderdiń tur­ǵanyn el biledi. Bir kezderi el ishine ylań sa­lyp, memleket qar­jysyn ońdy-soldy shashyp, ba­syna kún týǵan­da shet el asyp ketken baıshykesh-qylmysker­ler­diń endi eldiń saıası isine aralas­paq nıeti baryn partııa qata­ry­nan shyqqan músheler qapysyz sezedi. Sondyqtan ondaı aram aq­sha­men qurylatyn uıymǵa múshe bolýǵa, solardyń saıasatyn júr­gi­zýge úzildi-kesildi qarsylyq ta­ny­typ otyr. Olar arnaıy má­lim­deme jasady. «Halyqtyń paıdasyna qan­­­daı da bir sharalar uıymdas­tyr­maı, taratylatyn únparaq derekterinde jala jabýdan basqa eshteńe joq, qalyptasqan áleý­met­tik má­se­lelerdi sheshýge naq­ty usynys­tar belgilemeıtin «Alǵa» saıası qurylymynyń baǵ­dar­lamalyq qun­­dylyqtaryn saqtap kelgen, ha­lyq­tyń múd­de­leri men quqy­ǵyn qor­ǵaý baǵy­tyn­da zor úlesin qo­syp, saıası arenada óz ornyn qa­lyptas­tyr­ǵan Qazaqstannyń Kommýnıstik partııasymen birlesken sharalar uıymdastyrý josparyna biz qar­sylyǵymyzdy bildire oty­ryp, narazylyq belgisi retinde ózimiz­diń Kommýnıstik partııa qata­ry­nan shyǵýǵa eriksiz máj­búr bolyp otyrmyz», – delingen málimdemede. Partııa qatarynan shyqqan Qýa­nysh Ábdihalyqov olardyń bul bastamasyn saıası uıym qa­ta­ryndaǵy qalǵan áriptesteriniń de qoldaıtynyna, el birligine iritki salatyn áreketterge qar­sy­lyq tanytatynyna senedi. Erjan BAITILES, Qyzylorda oblysy.