Mereıli mereke qarsańynda qaraǵandylyq qaısar qyzdyń birqatar jetistikterin jurtqa pash etip, áskerı sarbazdy sońynan erip kele jatqan bolashaq jas jetkinshekterge úlgi etýdi jón kórdik. Jalpy, Tolqyn Bákijanova jaıly áńgime qozǵamas buryn qolyna qarý ustap, áskerde qyzmet etetin qyz-kelinshekter jaıly az-kem aıta ketken jón. Ońaı sharýa bolsa, ekiniń biri, egizdiń syńary osy mamandyqty meńgere qoıar edi. Eń aldymen, atalǵan aýyr joldy tańdaǵan áıel zatynda minez bolý kerek shyǵar. Qaıtpas qaısarlyq, óshpes ójettilik sarbaz sulýlarǵa eń asyl qarý bolsa qup. Bul turǵydan alǵanda, Tolqyn − topyraǵy tekti, súıegi asyl, tárbıeli otbasynan shyqqan úlgili ortanyń qyzy. Qarqaraly aýdanyna qarasty Egindibulaq aýylynyń týmasy bolǵandyqtan, onyń tektiligi tamyrynda, qazaqylyǵy qanynda dep bilemiz. Ol, sondaı-aq, mergen. Mergen bolǵanda da kil surmergender jınalǵan Qazaqstan Respýblıkasy Qarýly Kúshteriniń eki iri saıysynda nysana kózdeýde bas júldeni bermegen ıelengen eki dúrkin chempıon. Bul – jıyr- ma toǵyz jastaǵy Tolqyn Bákijanova úshin tolaıym tabys, jaqsy jetistik ekeni sózsiz. Mamandyǵyna adal mergen qyz 2007-2011 jyldary aralyǵynda E.Bóketov atyndaǵy Qaraǵandy memlekettik ýnıversıtetinde qarjyger mamandyǵyn alyp shyqqan. Otbasyndaǵy ortanshy qyzdy anasy basynda dáriger bolsa dep armandapty. Degenmen, bala kezde oıanǵan áskerı sarbaz bolý qııaly báribir osy jolǵa jetelep alyp keldi. −Alǵashqy kezderi buryn maǵan tanys emes áskerı tártipke úırený qıyndaý boldy, – deıdi bizdiń keıipkerimiz. – Sebebi, armııanyń tártibi ózgeshe. Al tártipsiz ásker bolmaıdy. Mysaly, on jyl burynǵy jaýynger men qazirgi jaýyngerdiń arasynyń ózinde aıyrmashylyq bar. Biraq, qazirgi áskerılerdiń jaýyngerlik áleýeti edáýir joǵary. О́ıtkeni, josparly túrde ótkiziletin jyl saıynǵy jaýyngerlik daıarlyqqa arnalǵan oqý-jattyǵýlar úlken kásibı deńgeıde ótýde jáne zamanaýı áskerı tehnologııalardy meńgerýde. Bilim ádistemesi jáne áskerı tehnologııalar ózgergen saıyn jaýynger bilimine talaptar joǵarylaıdy, – deıdi T. Bákijanova. Jalpy, patrıottyq tárbıe degenimiz tek Otanǵa degen jalań súıispenshilikten turmasa kerek. Bul otbasyndaǵy úlgi-ónege men mektepten bastalatyn minsiz qyzmetke de baılanysty ekeni sózsiz. Bizdiń sulý sarbazymyz da osy sózimizdi qýattaı túsedi. Áskerde tek qara kúsh emes, biliktilik kerek. Dana halqymyz «Bilekti birdi jyǵady, bilimdi myńdy jyǵady» degen joq pa edi, áskerı áıelder de elimiz Qarýly Kúshteriniń kóptegen salasynda qyzmet etip, er-azamattardan esh qalyspaı, oqý-jattyǵýlarynda aldyńǵy qatarda júr. Onyń ústine, áskerde sen áıelsiń, sen erkeksiń dep bólmeıdi. Bári qarý ustaǵan Otan qorǵaýshylar. Tolqyn Bákijanova solardyń biri. Tolqynǵa ıyǵyńdaǵy juldyzyń men bıigińdegi juldyzyń qatar jarqyrasyn demekpiz.
Mıras ASAN, «Egemen Qazaqstan»