Sammıt taqyryby «Ýımenomıka sheginen tysqary: múmkindikterdi jedeldetý» kásipker áıelderdiń áleýeti men múmkindikterin kórsete otyryp, olardyń bıznestegi basshylyq laýazymdarǵa kóterilý joldaryn aıqyndaýǵa, sonymen qatar, jahandyq naryqqa shyǵý múmkindikterin qamtamasyz etýge baǵyttalǵan.
Sammıt áıelderge arnalǵan jahandyq sharalar kúntizbesinde erekshe orynǵa ıe, ıaǵnı jańa ıdeıalar men iskerlik baılanystar ornatýǵa, jańa bilim alýǵa, bıznes pen kóshbasshylyqta tájirıbe almasýǵa múmkindik beretin álemdik pikir almasý alańy bolyp tabylady.
Bul mańyzdy jáne iri aýqymdy is-shara jumysyna álemniń barlyq memleketterinen 1000-nan astam áıel qatysty. Kezdesýlerdiń maqsaty − qazirgi tańdaǵy álemniń serpindi damý jaǵdaıyndaǵy áıelderdiń ekonomıkalyq hal-ahýalyn jetildirý boıynsha álemdik saıasat ókilderiniń, iri halyqaralyq uıymdar men kompanııalar ókilderiniń jáne kóshbasshy áıelderdiń pikirlerimen tanysý.
Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa músheleri Raýshan Sársembaeva men Dınar Núketaeva bastaǵan 85 kásipker áıelden turatyn qazaqstandyq delegasııa osy mańyzdy jıynǵa qatysyp qaıtty.
Sammıt jumysyna Japonııanyń Premer-mınıstri Sındzo Abe, Tokıo qalasynyń meri Iýrıko Koıke, Japonııanyń syrtqy ister mınıstri Fýmıo Kıshıda jáne Japonııanyń t.b. memlekettik organdarynyń ókilderi qatysty.
Mundaı aýqymdy is-sharanyń Tokıo qalasynda ótkizilýi kezdeısoq emes, bul – serpindi damyp kele jatqan Azııa naryǵynyń aıqyn mysaly. Sol sebepti sammıttiń plenarlyq otyrystarynyń mańyzdy taqyryptarynyń biri «Japonııamen bıznes-áriptestik ornatý» bolyp tabyldy. Al basqosýda japonııalyq jáne Azııa-Tynyq muhıty naryqtaryna shyǵý múmkindikteri jóninde tolyqqandy aqparat berildi.
Sammıt jumysy sheńberinde áıelderdiń korporatıvti kóshbasshylyqqa jetý múmkindikterin jyldamdatý jáne álem boıynsha áıelder basqaratyn kásiporyndar sanyn arttyrýǵa baǵyttalǵan strategııalar qurý boıynsha álemniń túkpir-túkpirinen túrli bastamalar talqylandy.
«Egemen-aqparat»