Tártip saqshylary 42 jastaǵy azamatty ustady. Ol Tıan-Shan taýlarynyń 20 shyrshasyn zańsyz alyp bara jatqan jerinen ustaldy, dep habarlaıdy QazAqparat.
О́ńirde Jańa jyl merekesi qarsańynda qylqanjapyraqty aǵashtardy kesý áreketteriniń aldyn alý maqsatynda «Shyrsha» atty jedel shara uıymdastyryldy. Osy sharanyń aıasynda orman sharýashylyqtary men qoryqtarynda 64 arnaıy jedel toptar jumys isteýde. Olardyń quramynda tártip saqshylary men tabıǵatty qorǵaý qyzmetiniń ókilderi bar.
«Orman sharýashylyqtary, saıabaqtar, bazarlar men saýda oryndary, ıaǵnı zańsyz kesilgen aǵashtar saýdalanýy múmkin oryndar da tekserilip jatyr. Sońǵy reıd barysynda Kólsaı shatqalynyń mańynda Tıan-Shıan taýlarynyń 20 shyrshasy tıelgen júk kóligi ustaldy. Kóliktiń júrgizýshisi aǵashtardy kesýge ruqsat beretin qandaı da bir qujattardy kórsete almady. Qazirgi tańda atalmysh fakti boıynsha qylmystyq is qozǵaldy. Memleketke kelgen shyǵyn 336 000 teńgeni qurap otyr»,-dep habarlady IID-niń tabıǵatty qorǵaý qyzmeti.
Eki aptanyń ishinde óńirde tabıǵatty qorǵaý zańdaryn buzý áreketteriniń 25 faktisi anyqtaldy. Olardyń 8-i ekologııalyq qylmystar sanatyna jatady.