Búgin Qazaqstan Prezıdenti Nursultan Nazarbaev Reseı Federasııasyna jumys sapary aıasynda Sankt-Peterbýrgtegi óndiriske qajetti zamanaýı joǵarytehnologııaly qurylǵylar shyǵarýda álemde kósh bastap turǵan kompanııalardyń biri sanalatyn «Dıakont» AQ kásipornynda boldy. Elbasy oǵan Reseı Prezıdenti Vladımır Pýtınmen birge bardy.
«Dıakont» - óndiriste ǵylymnyń tıimdiligin arttyrýǵa, qaýipsizdikti qamtamasyz etýge arnalǵan joǵary tehnologııaly qurylǵylar shyǵarýmen álemge aty áıgili kásiporyn. Búginde bul kásiporynda álemdik deńgeıdegi joǵary sapaly, ınnovasııalyq ónimder shyǵarylady. Máselen, dıagnostıka men jóndeý jumystaryna arnalǵan robototehnıkalyq keshender, radıasııaǵa tózimdi televızııalyq kameralar, atom energııasyna arnalǵan tehnıkalyq úderisterdi basqarýdyń avtomattandyrylǵan júıeleri sııaqty qurylǵylar jasaıdy.
Qazaqstanda «Dıakonttyń» dıagnostıkalyq robottary 2009 jyldan beri qoldanysta. Ol «Intergaz-Sentralnaıa Azııa» kompanııasynyń jumysyna engizilgen. Sondaı-aq, radıasııaǵa tózimdi kameralary bes jyldan beri Energetıka mınıstrliginiń «Iаdrolyq fızıka ınstıtýtynda» nátıjeli jumys isteýde. Al 2016 jyldan beri Qaraǵandydaǵy "Týrbomehanıkalyq zaýyttaǵy" amerıkalyq qurylǵylardyń ornyn osy «Dıakonttyń» áldeqaıda kúshti ári tıimdi ónimderi almastyra bastady.
Dınara BITIKOVA, «Egemen Qazaqstan».
Sankt-Peterbýrgten