«Týrıstik Qamqor» korporatıvtik qory shetelde qalyp qoıǵan Qazaqstan azamattaryn elge qaıtarý boıynsha sharalar qabyldaıdy. Búgin Ortalyq kommýnıkasııalar qyzmetinde ótken brıfıngte syrtqy týrızm salasynda QR azamattarynyń quqyǵyn kepildendirý júıesiniń negizgi erejeleri túsindirildi.
Investısııalar jáne damý mınıstrligi týrızm ındýstrııasy departamentiniń deregi boıynsha, 2014-2015 jyldary jaýapsyz týrıstik naryq ókilderiniń kesirinen kóptegen otandyq týrısterdiń shet elderde ornalasqan oryndarynyń aqysy men keri qaıtatyn jol aqylary tólenbeı qalǵan. Endi osyndaı jaǵdaılar oryn alatyn bolsa, «Týrıstik Qamqor» korporatıvtik qory shetelde qalyp qoıǵan Qazaqstan azamattaryn elge qaıtarý boıynsha sharalar qabyldaıdy.
Eske sala keteıik, bıyl 7 qarashada Qazaqstan Respýblıkasynyń Úkimeti týroperatorlardyń ózderine júktelgen mindetterin durys oryndamaǵan jaǵdaıynda otandyq týrısterdi elge qaıtarý máselelerin retteıtin, ıaǵnı, azamattarymyzdy ýaqytsha qalyp qoıǵan elderinen Qazaqstan terrıtorııasyna alyp kelýdi qamtamasyz etetin 2 qaýly qabyldady.
Aıdar О́risbaev, "Egemen Qazaqstan".