El Táýelsizdiginiń 25 jyldyǵy toılanyp jatqan kúni Aqmola oblysynda alaqaı qýanyshqa bólegen 26 náreste ómirge keldi.
Jeltoqsannyń 16-juldyzynda jurtshylyq 26 sábıdiń baýy berik bolsyn degen tilek aıtty. Nárestelerdiń 13-i er jáne 13-i qyz bala ekendigi de júrekke jylylyq uıalatady.
Oblystyq ádilet basqarmasynan alynǵan málimet te kóńil ósiredi. Onda ústimizdegi jyldyń 20 jeltoqsanyna deıin óńirde 11832 náreste dúnıe esigin ashqandyǵy habarlanǵan. Munda uldardyń sany basymdaý kórindi, ıaǵnı uldar 6108 bolsa, 5724 qyz bala shańyraqtardy shattyqqa bóledi.
Bıylǵy jyly týǵan sábılerge ata-analar Aıarý, Nurıslam, Batyrhan, Arına, Káýsar, Aıkún, Aısultan, Jansultan esimderin berip jatyr. Aqmolalyqtar halqymyz úshin asa qasterli kúni dúnıe esigin ashqan bóbekter Táýelsiz elimizdiń tutqa ustar azamattary bolady dep senedi.
Baqbergen AMALBEK,
«Egemen Qazaqstan»
Aqmola oblysy