Táýelsizdiktiń 25 jyldyǵyna oraı «Nur Otan» partııasynyń Almaty qalasyndaǵy bólimshesinde «Táýelsizdik – uranym, Máńgilik El – turaǵym» atty respýblıkalyq ǵylymı-tájirıbelik konferensııa ótip, Aýǵan soǵysy ardagerleriniń basyn qosqan alqaly jıyn Memlekettik hatshy Gúlshara Ábdiqalyqovanyń quttyqtaý sózimen ashyldy.
Memlekettik hatshynyń quttyqtaýyn jetkizgen Májilis depýtaty, Aýǵan soǵysy ardargerleri uıymdarynyń «Qazaqstan ardagerleri» qaýymdastyǵynyń tóraǵasy Baqytbek Smaǵul konferensııa jumysyna sáttilik tilep, Otan úshin ot keshken oǵlandardyń erlik isterine sát saıyn taǵzym jasap, esimderin jadyda jańǵyrtyp turý azamattyq paryz ekenin qaıyra bir eske saldy.
HHI ǵasyrdyń basty talaby tatýlyq, kelisim, toleranttylyq bolyp otyrǵany barshaǵa aıan. Yntymaq jarastyryp, elge, jerge degen súıispenshilikti, Otanǵa adaldyqty sezinip, ata-babadan muraǵa qalǵan asyl qundylyqtardy arttyrý erliktiń de, eldiktiń de úlgisi bolyp qala beretinin jıynda sóz alǵan azamattardyń barshasy shegeleı aıtyp jatty.
Konferensııaǵa qatysýshylardy quttyqtap, jumysyna tabys tilegen Din isteri jáne azamattyq qoǵam mınıstrligi azamattyq qoǵam komıtetiniń tóraıymy Álııa Ǵalymova Memleket basshysynyń jemisti bastamalary negizinde elimizdegi táýelsizdik pen qaýipsizdikti saqtaýdyń keshendi jumystary atqarylyp kele jatqanynan, osyǵan sáıkes, azamattyq qoǵam komıtetiniń beıbit ómir men tynyshtyqty qamtamasyz etetin birneshe negizgi baǵdary belgilep qoıylǵanynan kópshilikti habardar etti. Al «Jas Otan» jastar qanatynyń tóraǵasy Shahmardan Baımanov ıdeologııalyq keńistiktiń bosańdaý bolyp qalǵan tusynda jastarǵa áskerı-patrıottyq tárbıe berýde Aýǵan soǵysy ardagerleriniń sińirgen eńbegi zor bolǵanyn atap ótti. Bıylǵy jyly jasotanshylardyń quzyrly oryndarmen, ókildermen ózara áriptestik ornatyp, oblystarda «Áskerdegi bir kún» atty jastardyń kásibı ortalyqtary men bólimderimen kezdesýler ótkizip, urpaqtar sabaqtastyǵy jobasy aıasynda ardagerlermen, qoǵam qaıratkerlerimen basqosýlar ótkizgenin maqtanyshpen jetkizdi.
«Nur Otan» partııasy Aýǵan soǵysy ardagerlerine únemi izet, qurmet kórsetýdi nazardan tys qaldyrǵan emes. Konferensııanyń ekinshi bóliminde birqatar sum soǵystyń kýágeri bolǵan ardagerlerge arnap tósbelgi tartý etildi.
Aıgúl AHANBAIQYZY,
«Egemen Qazaqstan»
ALMATY