Mádenıet jáne sport mınıstri Arystanbek Muhamedıulynyń tóraǵalyǵymen 2017 jyly Almaty qalasynda ótetin 28-shi Qysqy ýnıversıada oıyndaryna daıyndyq barysy jóninde keńeıtilgen jınalys ótti, dep habarlaıdy QazAqparat.
Jıynǵa Sport jáne dene shynyqtyrý isteri komıteti, Astana jáne Almaty qalalarynyń sport basqarmalary, 28-shi Qysqy ýnıversıadany uıymdastyrý boıynsha dıreksııa men Ulttyq shtattyq komandalar jáne sporttyq rezerv dıreksııasynyń basshylary, Bilim jáne ǵylym mınıstrliginiń ókilderi jáne sport túrleri boıynsha bas bapkerler, memlekettik jattyqtyrýshylar qatysty.
Otyrys barysynda Ulttyq qurama komandanyń daıyndyǵy boıynsha Sport komıtetiniń tóraǵasy, Ýnıversıada oıyndaryn uıymdastyrý máselesi boıynsha dıreksııa basshysylarynyń baıandamalary tyńdaldy. Ár bapker óz sport túrleri boıynsha ulttyq qurama sportshylarynyń daıyndyǵy jóninde naqty aqparattar berdi. Ýnıversıada oıyndaryn uıymdastyrý men sportshylardy daıyndaý barysynda oryn alǵan máseleler mınıstr Arystanbek Muhamedıulynyń qoldaýymen sheshimin tapty.
«Búgin biz jaqsy nátıjeli otyrys ótkizdik. Ýnıversıadanyń jalpy ótý barysy men bizdiń ulttyq qurama sportshylarynyń babyn keltirý jóninde biraz máseleniń basyn ashyp, sheship aldyq. Endigi maqsatymyz – osy jasalǵan aýqymdy istiń tolyq qorytyndysyn kórý. Ýnıversıadanyń bastalýyna otyz kúnnen astam ýaqyt qaldy osy ýaqyt aralyǵynda jospar boıynsha áreket etýlerińizdi tapsyramyn. Kelgen árbir qonaq, halyqaralyq uıym ókilderi men sportshylar Qazaqstannyń qarqyndy damyp kele jatqan qýatty el ekenin kóredi dep senemin. Elbasy Nursultan Ábishulynyń sarabdal saıasatynyń arqasynda osyndaı úlken jobalardy qolǵa alyp otyrmyz. Demek, bizge júktelgen mindetimizdi abyroımen atqarýǵa bar kúsh jigerimizdi salýymyz kerek», – dedi Arystanbek Muhamedıuly óziniń qorytyndy sózinde.