Negizgi mamandyǵy akter bolsa da, el ony aldymen aıtys sahnasynan kórip, aqyn retinde tanydy. Aǵalarmen aıtyssa iniligin, inilermen aıtyssa iriligin kórsetetin, ápkelerin ádemi ázilimen áspettep otyrsa da ádeptiligin saqtaıtyn sary aýyz balapannyń sahnadaǵy alǵashqy qadamy sátti bastaldy.
Júrsin Ermannyń ózi kópten jasyryp júrgen «kójegimiz» dep alqaly jurttyń aldyna shyǵaryp, topqa qosyp, tomaǵasyn sypyrdy. Jaǵymdy daýysy, jalyndy sózimen jarasym tapqan jas aqyn kóptiń kóńilinen shyǵyp, kórermenniń kózaıymyna aınaldy. Ol kim deısiz ǵoı? Ol – Tóreǵalı Tóreáli. Aıtystyń aýylynan qanat qaǵyp, estradanyń tórinen tóbe kórsetip júrgen Tóreǵalıdiń ataǵy aspandamasa, alasarǵan joq. Sebebi, kómeıinen tógilgen árbir án kórermenniń kókeıine baryp quıylyp jatyr. Tóreǵalıdiń ózi aıtpaqshy, «Án bolsyn, basqa bolsyn jarq etip shyqqan kez kelgen jaqsy dúnıeniń artynda jany qazaq, qany qazaq azamattar júredi. Kórermen, tyńdarman seniń ónerińe qol soǵyp qoshemettep otyrsa da, olar sahnanyń syrtynda qandaı eńbektiń atqarylyp jatqanyn, qanshama mańdaı terdiń tógilgenin sezine bermeıdi. Sol sıaqty, meniń de óner jolymda ózindik qoltańbasy bar azamattar bar. Qaınar Alagózov, Aıan Seıitov sekildi aqyn dostarymmen Qural Moljanov syndy sózimizge án jazatyn talantty baýyrlarymnyń eńbegi erekshe». Iá, «Jalǵyz aǵash orman bolmas, jalǵyz kirpish qorǵan bolmas» degendeı, aınalańdy taspen emes, dospen qalaǵanǵa ne jetsin. Bul rette Tóreǵalıdiń baǵy basym deýge bolady. «Erinderi keseden Basqa jerge tımegen. Qadirimdi biletin Qazaq qyzǵa úılenem», dep keletin ánniń de sózin Qaınar jazǵanyn bireý bilse, bireý bilmes. Sazy men sózinen satıralyq sarynnyń samaly esetin bul týyndyny ótken jyldyń oljasy deýge bolady. Tilge jeńil, júrekke jyly ushyrasatyn ándi bir tyńdaǵannan-aq jattap alasyz. Sóz qurylymynyń ońaılyǵy sonshalyq, ekinshi estigende eriksiz sanańyzda saırap turady. Tirkesteri tilińizdiń ushyna ózinen-ózi oralady. «Allo» degen ánniń sózin jazsa da, telefonyn «Allo» dep áreń kótergen Qaınardy «Izdeme» dese de, izdep taýyp aldyq. Sóıtsek, ol «qazaq qyzǵa úılenip te» úlgeripti. Ony izdeýdegi maqsatymyz – «Qazaq qyzǵa úılenem» ániniń shyǵý tarıhyn, jazylý ıdeıasyn oqyrmanmen bólisý edi. «Bol janymda» degen aqynnyń janynda bola almasaq ta, uıaly telefon arqyly symsyz baılanys ornatyp, ánniń qalaı shyqqanyn bildik. «Bul án búgingi tańdaǵy qazaq qyzdarynyń sheteldik jigitterge turmysqa shyǵyp jatqanyna jáne qazaq jigitteriniń sheteldiń arýlaryn jar qylyp jatqanyna ishteı qarsylyq bildirip, ómirge kelgen dúnıe edi. El-halyqtyń arasynda taralyp, kishkentaı bóbekterimiz jatqa aıtyp júrgenin kórgende, kishkene bolsa da armanymyz oryndalǵandaı qýanyp qalamyz. Búldirshinderdiń barlyǵy «qazaq qyzǵa úılenem» dep aıtyp júredi. Sol arqyly olardyń mılaryna aqparat jetedi. Sóıtip, olar óskende qazaq qyzyna úılenedi degen senimimiz bar. Negizinen ánniń mátini dastarqan basynda dúnıege keldi. Bir otyrysta birneshe ulttyń qyzdary boldy, sol jıynda men árqaısysyna sýyryp salyp óleń quradym. Tóreǵalı ony dıktafonǵa basyp alǵan eken. Án qylyp shyǵarý ıdeıasy sodan týyndady. О́zim aıtysker aqyn bolǵandyqtan osyndaı sátti shýmaqtar sýyryp salyp, aıaq astynan aıtqanda keledi», deıdi avtor. D.Dáýletovtiń «Eh, janym, Kúlaına» ániniń maqamyna salynyp aıtylǵan, astarynda shyndyǵy da bar ázil án jyl boıy júrekterge qýanysh syılaǵany jasyryn emes. О́nerpaz órenderden keler jyly da ómirsheń týyndylar kútemiz.
Raýan QAIDAR, «Egemen Qazaqstan»