Taıaýda Qaraǵandyda óńdeýshi kásiporyn uıymdastyrý boıynsha ótkizilgen tenderdiń qorytyndysy jarııalandy. Jeńimpaz atanǵan «Recycling Company» JShS jylyna 50 myńdaı eski avtomashınany qabyldap, metaldaryn qaıta balqytýǵa jiberýdi moınyna alyp otyr.
Qoldanystan shyǵyp qalǵan kólik quraldaryn kádege jaratýmen shuǵyldanatyn Qazaqstandaǵy tuńǵysh zaýyttyń qurylysy aldaǵy jyldyń naýryz aıynda bastalyp, jarty jyl ishinde aıaqtalady dep josparlanǵan. «Recycling Company» JShS zaýytty ıtalııalyq zamanaýı qondyrǵymen jabdyqtamaqshy. Bul qondyrǵynyń kómegimen saǵatyna 20-25, aýysym saıyn 150-shaqty jeńil avtokólikti «ettartqyshtan ótkizgendeı» etýge bolady eken. Iаǵnı, zaýyt jyl saıyn 50 myń avtomashınany qaıta jaratýǵa bolatyn metall shıkizatyna aınaldyra alady.
Eski kólikterdi metall synyqtaryna aınaldyrmas buryn, olar mindetti túrde tehnıkalyq suıyqtyqtardan tazartylyp, syrtqy poshymy tyǵyzdalyp-nyǵyzdalyp, Qaraǵandy oblysyndaǵy metallýrgııalyq zaýyttarǵa jóneltiledi.
Bul eski kóliginiń qańqasynan qutyla almaı júrgen azamattar úshin de, metall shıkizatyn qolaıly baǵamen alǵysy keletin kásiporyndar úshin de tıimdi bolmaq.
Qaırat ÁBILDINOV,
«Egemen Qazaqstan»
QARAǴANDY