Ońtústik Qazaqstan oblysynda oblys ákimi Janseıit Túımebaevtyń tóraǵalyǵymen apparattyq májilis ótti dep habarlaıdy egemen.kz tilshisi.
Kún tártibinde 2016 jylǵy qujat aınalymy men ondaǵy tapsyrmalardyń oryndalý jaıy talqylandy. Bul jóninde oblys ákimi apparatynyń basshysy Erkeǵalı Álimqulov baıandama jasady.
Aryz-shaǵymdar boıynsha arnaıy toqtalǵan apparat basshysy 2016 jyly oblys ákimdigine 3896 ótinish kelgenin aıtty. Onyń ishinde, jeke tulǵalardan 2973, zańdy tulǵalardan 923 ótinish tirkelgen. Bul 2015 jylmen salystyrǵanda 164 ótinishke kemigendigin kórsetedi. Alaıda birqatar aýdan, qalalarda turǵyndardyń aryzdaný jaǵdaılary ósken.
- Jalpy árbir basqarma basshysy, óziniń jetekshilik etetin sala boıynsha jaýapty tulǵa bolyp tabylady. Alaıda, keıbir hattamalyq tapsyrmalardyń oryndalmaýy olardyń jaýapkershilikteriniń tómendigin, sonymen qatar, óz mindetterin oryndaýǵa nemquraıdylyq tanytatyndyǵyn kórsetedi. Osyǵan oraı, basqarma basshylaryna hattamalyq tapsyrmalardy oryndaýǵa eki apta merzim beremin, - dedi oblys ákimi.
Baqtııar Taıjan, «Egemen Qazaqstan»