Qostanaıda «Táýelsizdikke arnaý: Máńgilik El jastary jyrlaıdy» aımaqtyq jas aqyndar aıtysy ótti. Jyr dodasyna on aqynnyń beseýi Qostanaıdan qosylsa, beseýi Qaraǵandydan, Semeıden, Pavlodardan, Arqalyqtan keldi. Aıtys qashan da halyqtyq ónerge sýsap otyratyn kórermenniń shólin basatyn sýat sekildi. Qostanaılyq jyrsúıer qaýym «talaptyń tulparyn mingen» jas aqyndardyń árqaısysy aıtqan tushymdy oıǵa, tapqyr ázilge, oramdy sózge qol soǵyp, qoshemetin aıamady.
Aıtysqa Qostanaı óńirindegi elimizge tanymal aqyn-jazýshylar Ásııa Berkenova, Ǵumar Ahmetchın, Naǵashybaı Muqatov, Álfııa Ormanshına jáne Abylaı Maýdanov qazylyq jasady.
– Bul jolǵy aıtystyń basty ereksheligi – onyń shynaıylyǵy der edim. Keı aıtystarda jap-jas aqyn shyǵady da, aldyn ala daıyndap kelgen jyryn Asan qaıǵy sekildi tolǵanyp, qara aspandy sýǵa aldyryp aıtqanda, qanshalyqty ýaqyttyń ózekti máselelerin kótergenmen de shynaıylyqtyń joqtyǵynan kórermenin maı ishkendeı etedi. Al bul aıtysta jas aqyndar óz jasyna, jastyq shaqqa laıyq máselelerdi aıtty, barlyǵy da jarasym taýyp turdy, – deıdi Abylaı Maýdanov.
Júırikten júırik ozǵan aıtysta qazylar bas báıgeni on aqynnyń ishindegi qyzǵaldaqtaı qostanaılyq aqyn qyz Nárııa Aqbabaǵa laıyqtap, ol 500 myń teńgeni ıelendi. Nárııanyń sýyrypsalmalylyǵymen qatar, qarsylasyn sastyratyn tapqyr ýáj aıta biletindigi kórermenin de, qazylardy da tánti etti. Birinshi oryndy ıelengen pavlodarlyq Nurqanat Qaıratqa 250 myń teńge berildi. 200 myń teńgeni semeılik Serik Qýanǵan qanjyǵaǵa baılady. 3-shi oryn men 100 myń teńge aqshalaı syılyq arqalyqtyq Batyrlan Saǵyntaıǵa tabys etildi. Y.Altynsarın jáne A.Baıtursynov atyndaǵy arnaıy júldeler árqaısysy 80 myń teńgeden Qaraǵandydan kelgen Nurmuhammed Baısúgirov pen arqalyqtyq Qaırolla Hafızǵa berildi. Aıtysqa qatysqan Nursultan Qasym, Aıbar Raǵatov, Bekbolat Qalenov, Ernur Áýezhan sekildi jas aqyndar da nazarsyz qalǵan joq, yntalandyrý syılyǵymen marapattaldy.
Názıra JÁRIMBETOVA,
«Egemen Qazaqstan»
QOSTANAI