Sharanyń negizgi maqsaty – túbi bir túrki tilderiniń tarıhy men búgingi jaıyn, túrki ulystaryna ortaq muralardyń tildik erekshelikteri men tilderdi damytýdaǵy rólin zerdeleý.
Quryltaıǵa 33 memleketten 250 ǵalym qatysyp, túrki ádebıeti men tiliniń san túrli máselelerin qamtıtyn baıandamalar jasaldy, eldiń órkendeýindegi tildiń mańyzy, bolashaqtaǵy taǵdyry talqylandy. Qazirgi jaHandaný dáýirinde Túrki mádenıetiniń tereń tamyry men tiliniń derbestigin, tazalyǵyn saqtap qalýdyń joldary sóz boldy.
Túrki ulystarynyń YIII "2017 Turk Dili Yili" quryltaıyna Túrkııa eliniń Prezıdenti Redjep Taııp Erdoǵan kelip, quryltaıdyń mańyzy týraly aıtty, bolashaqtaǵy isteletin isterge baǵyt-baǵdar berdi. Sóziniń sońynda túrik Prezıdenti 10 ǵalymǵa "Túrki tiliniń damýyna úles qosqan ǵalym" halyqaralyq marapatyn saltanatty túrde tabystady. Bul marapatty Túrkııa, Germanııa, Qazaqstan, Ońtústik Koreıa, Ázirbaıjan jáne Qyrǵyzstan ǵalymdary aldy. Qazaqstannan osy marapatty fılologııa ǵylymdarynyń doktory, Abaı atyndaǵy Qazaq Ulttyq pedagogıkalyq ýnıversıtetiniń professory Gúlbaný Qosymovanyń ıemdenýi bárimiz úshin úlken maqtanysh, jan tolqytarlyq sát boldy. Gúlbaný Qosymovanyń túrkologııa jáne tildiń tarıhy, sheshendik óner salasyndaǵy zertteýleri Qazaqstannan tys elderde, ásirese Túrkııada da belgili bolatyn.
Quryltaıǵa qatysýshylar Ankarada ótken túrki ǵalymdarynyń basqosýyna jáne ony uıymdastyrǵan Halyqaralyq lıngvıstıkalyq qoǵamǵa sheksiz rızashylyǵyn bildirdi.
Kenan Koch,
fılologııa ǵylymdarynyń doktory, professor,
qazaq tiliniń sheteldegi zertteýshisi