Palata 2015 jylǵy 8 qyrkúıektegi «Tabıǵı teriden jasalǵan kıim zattary, kıimge kerek-jaraqtar jáne ózge de buıymdar» taýar pozısııasy boıynsha taýarlardy baqylaý (ıdentıfıkasııalaý) belgilerimen tańbalaýdy engizý jónindegi pılottyq jobany 2015-2016 jyldary iske asyrý týraly kelisimniń qoldanylý merzimin uzartý jónindegi hattamany ratıfıkasııalady.
2017 jyly pılottyq joba nátıjelerine taldaý júrgizý qajettigine baılanysty Kelisimniń qoldanylý merzimin 2018 jyldyń 31 jeltoqsanyna deıin uzartylatyn boldy.
Sondaı-aq senatorlar Qazaqstan Respýblıkasy men Azııa Damý Banki arasyndaǵy Qaryz týraly kelisimdi (Jaı operasııalar) (OAО́EY 1 jáne 6-dálizderin qosatyn «Aqtóbe – Maqat» avtomobıl jolyn rekonstrýksııalaý jónindegi joba) ratıfıkasııalady.
2016 jylǵy 7 jeltoqsanda Astanada qol qoıylǵan Kelisim «Aqtóbe – Maqat» avtomobıl jolyn rekonstrýksııalaýdy qarjylandyrýǵa 240 300 myń AQSh dollary mólsherinde qaryz berýdi kózdeıdi. Respýblıkalyq bıýdjetten qaryzdy birlesip qarjylandyrýǵa 32 765 myń AQSh dollary bólinedi.
Qaryz 5 jyldyq jeńildikti kezeńdi qosa alǵanda, 18 jyl merzimge beriledi. Qaryzǵa qyzmet kórsetýdi jáne óteýdi respýblıkalyq bıýdjet qarajaty esebinen elimizdiń Qarjy mınıstrligi júzege asyratyn bolady. Senattyń Qarjy jáne bıýdjet komıtetiniń múshesi Erbolat Muqaev bul zańnyń mańyzdylyǵyn aıta kelip, Úkimettiń nazaryn joldardyń boıynda demalatyn oryndar, ýaqytsha kólik toqtaý alańdary, tamaqtaný, saýda-sattyq pýnkteri, tehnıkalyq qyzmet kórsetý stansııalary, qalalardyń kireberisinde kólik jýý pýnkteri, avarııalyq shaqyrý baılanysy, joldar boıyndaǵy eldi mekenderdiń tusynda jol jaǵasyndaǵy bıznes múldem joqtyń qasy ekendigine aýdardy. Senatordyń pikirinshe, mundaı qadamdar júzege asyrylsa halyqaralyq tranzıttik baǵyttyń básekege qabilettiligin arttyrýǵa septigin tıgizedi.
Senatorlar «Qazaqstan Respýblıkasynyń keıbir zańnamalyq aktilerine ósimdikter men janýarlar dúnıesi máseleleri boıynsha ózgerister men tolyqtyrýlar engizý týraly» zańdy ekinshi oqylymda qarap qabyldady.
Bul qujat bıologııalyq áralýandyqty saqtaý úshin ekonomıkalyq, áleýmettik, uıymdastyrýshylyq jáne ózge de jaǵdaılardy jasaýǵa baǵyttalǵan. Atap aıtqanda, orman jáne ań aýlaý sharýashylyǵy, erekshe qorǵalatyn tabıǵı aýmaqtar salasyndaǵy qoldanystaǵy zańnamaǵa, sondaı-aq ekologııalyq jáne ózge de aralas zańnamaǵa túzetýler engizý kózdelip otyr.
Zańda jekelegen baptar ormandy paıdalaný, balyq sharýashylyǵy qyzmeti, janýarlar dúnıesi obektilerin jasandy ósirýdi, janýarlardy elimizge ákelý jáne áketý máselelerin qarastyrady. Memlekettik ulttyq parkter men olardyń qorǵalatyn aımaqtarynyń aýmaqtaryn paıdalaný tártibi naqtylanyp, bıosferalyq rezervattardyń quqyqtyq tártibi belgilenedi.
Zań 2019 jylǵy 1 qańtardan bastap orman sharýashylyǵy men erekshe qorǵalatyn tabıǵı aýmaqtar qyzmetkerleriniń laýazymdyq eńbekaqylaryn 25 paıyzǵa joǵarylatýdy, sondaı-aq olarǵa mal jaıý men shóp shabý úshin jer ýchaskelerin berýdi kózdeıdi.
Otyrys barysynda senatorlar saýaldary joldandy. Senatorlar: Serik Aqylbaı – túzetý mekemeleri qyzmetkerleriniń jalaqylaryn kóterýge qatysty, Vladımır Redkakashın – mektep bitirýshiler sharalaryna aqsha jınaýǵa baılanysty; Jabal Erǵalıev – Keńes Odaǵynyń Batyry Málik Ǵabdýllınniń mereıtoıy ótkenimen, depýtattyq saýal arqyly Úkimetke jasalǵan usynystyń aıaqsyz qalǵany jóninde depýtattyq saýaldaryn joldady.