Merekelik keshti tamashalaýǵa kelgen 50 myńǵa jýyq qala turǵyny men qonaqtardyń basy «Qazaq eli» monýmenti alańynda toǵysty. Alýan túrli shyǵarmashylyq top shoǵyrlanǵan konsertke Qaırat Nurtas, Glıýkoza, Tóreǵalı Tóreáli, MOT, Anna Semenovıch, Djıgan, Alekseev, «Vıntaj» sııaqty TMD elderiniń tanymal estrada ánshileri qatysyp, astanalyqtarǵa serpilis pen kóterińki kóńil-kúı syılady.
Ekssentrıkalyq obrazdarymen kópshilikti tańyrqatqan reseılik pop-grýppa «Vıntaj» ádettegideı elektronıka, dans-pop sııaqty túrli mýzyka janry aralasqan ánderin oryndap, sahnalyq shoý usyndy. Jýrnalısterge bergen suhbatynda, olar Astanany 20 jyldyq mereıtoıymen quttyqtap, jyly lebizderin arnady.
«Mýzart» tobynyń izbasary «Muzart live» jobasynyń jeńimpazdary da osy keshte tóbe kórsetti. Kezindegi syrshyl ánderimen halyq júregin baýraǵan «MýzArt» sııaqty birden qoshamettiń astynda qalyp jatpasa da, keshte alǵash ret kópshilik nazaryna usynǵan «Astana» atty jańa ándi oryndaý barysynan tájirıbeli lep ańǵarylǵandaı. Jýyrda «Júregim seni ańsaǵan» atty beıneklıpti kópshilikke usynǵan olar, shyǵarmashylyq izdenis ústinde ekenin aıtty.
– Jarty jyl kóleminde stýdııada jatpaı-turmaı onnan astam án jazdyrdyq. Aldaǵy ýaqytta «MýzART» tobyndaǵy aǵalarymyzben birlesip, el aýmaǵynda gastroldik saparǵa shyqpaq oıymyz bar. Aǵalarymyz únemi «birlikte bolyńdar» úndep otyrady, – degen top ánshileriniń biri Serikbolsyn Kishkenbaev bokaldan bólek, bı men sahna ádebi boıynsha aptalap daıyndalyp jatqandaryn aıtady. Top jigitteriniń aıtýynsha, shilde aıynyń basynda «MýzART» tobymen birge óner kórsetpek. Sonymen birge jaqyn kúnderi ekinshi beıneklıpteri otandyq telearnalardan kórsetiletin bolady.
Kópshilikke Mot esimimen tanylǵan belgili reper Matveı Melnıkov te osy keshte óner kórsetti. О́ziniń ashyq-jarqyn bolmysymen kópshilikti jatyrqamaıtyn ol, qazaqstandyqtardy búgingi merekemen quttyqtady.
– Mereke qutty bolsyn. О́zim de bala tárbıelep otyrǵan ákemin, barlyq balalardyń baqytty bolýyn tileımin, – degen ánshi múmkindik bolyp jatsa qazaqstandyq ánshilermen birlesip jumys istegisi keletinin aıtty. – Reseı shoý bıznesinde qazaqstandyq ánshilerdiń alar orny erekshe. Qazaqstandyq ánshilerdiń ishinde Qaırat Nurtaspen shyǵarmashylyq birlestikte jumys istegim keledi, – deıdi ol.
Aıa О́MIRTAI,
«Egemen Qazaqstan»
Sýretterdi túsirgen Erlan OMAROV