Bul kúni Keńes aýylynda Taraz ınnovasııalyq-gýmanıtarlyq ýnıversıtetiniń, oblystyq mádenıet, arhıvter jáne qujattama basqarmasy halyq shyǵarmashylyǵy ortalyǵynyń jáne Moıynqum aýdany ákimdiginiń uıymdastyrýymen segiz kıiz úı tigilip, altybaqan quryldy. Bul sapar halqymyzdyń ejelgi turmys-tirshiligin, salt-dástúrin eske túsiretin erekshe kún boldy. Ǵasyrlar boıy qalyptasqan baı mádenıetimiz ben tarıhymyz da etnografııalyq kerýenniń ón boıynan kórinis taýyp turdy. Sonymen qatar, jınalǵan kópshilik aýyldyń turmysy da tamyrymyzdyń bir bólshegi ekenin sezine tústi. Aýyl irgesinde bıe saýý, urshyq ıirý, dıirmen tartý jáne jún sabaý sııaqty turmys qundylyqtary da nasıhattaldy. Al óńirge belgili qusbegiler baptaǵan búrkitin aınala ushyryp, ejelgi dala mádenıetiniń mazmunyn kórsetti. Qustyń aspandy aınala ushyp júrip, kenet búrkitshige kerýenniń kele jatqanynan belgi berýi de talaıdy tańdandyrmaı qoımady. Shýdasy jelmen jelkildegen túıelerdiń tarpań beıneleri men ulttyq kıimderi sán-saltanatyn keltirip turǵan adamdar arasyndaǵy ózara baılanys ta Uly Dalanyń degdar bolmysyn, kórkem kelbetin tanytyp turǵandaı áser etti. Al kúımeleri kúmbirlegen kóshti aýyl turǵyndary ulttyq dástúrge saı qarsy aldy. Qazaqy dástúrge saı qynama bel qamzol kıgen qyz-kelinshekter kerýenshilerge qymyz ben shubat usynyp, iltıpat kórsetti. Shara barysynda qazaqtyń balany besikke salý, tusaýyn kesý, toqymqaǵar sııaqty ulttyq salt-dástúrleri dáripteldi. Úlkender jaǵy jastarǵa bilmegenin úıretip, úlgi kórsetti. Ásirese, bul kórinis bolashaq analar úshin de paıdaly keńes boldy. Sondaı-aq, jergilikti ónerpazdar men saltanat qonaqtary án shyrqap, Moıynqum dalasyn áserli kúıge bóledi. Halqymyzdyń yqylymnan kele jatqan yrysty saltynyń biri – saparǵa oń bolsyn aıtý bolǵan. Babalar ósıetimen jalǵasyp kele jatqan osynaý ıgi dástúr búginde qoldaý taýyp, jınalǵan kópshilik Astana tórine bet alǵan kerýenshilerge sát-sapar tiledi. Oblys ákiminiń orynbasary Erqanat Manjýov bastaǵan jambyldyqtar Moıynqum aýdanynan etnografııalyq kerýendi shyǵaryp saldy. Aıta keteıik, Moıynqum aýdany, Keńes aýyly atalǵan kerýenniń Jambyl oblysyndaǵy sońǵy beketi. Al kesh túse «Uly Jibek joly. Kóne Tarazdan asqaq Astanaǵa tartý» kerýeni Qaraǵandy oblysy, Saryshaǵan aýylyna qaraı bet aldy. Endi sanaýly kúnderden keıin kúımeler kúmbiri kórme alańyna da estilip qalatyn bolady. Aıtýly kórmeni tamashalaýshylardyń da ulttyń uly ereksheligimen tanysatyn kúni alys emes.
Hamıt ESAMAN, «Egemen Qazaqstan»
Jambyl oblysy