Kezdesý Memleket basshysy Nursultan Nazarbaev bilim alǵan Qaraǵandy memlekettik tehnıkalyq ýnıversıtetinde ótti. Ákim biregeı sáýletpen kórikti elordamyzdyń qurylysyna úles qosqan qurylysshylarǵa alǵys bildirdi.
«Osy jerde Memleket basshysymen qatar júrip, elordany salýǵa járdemdesken qurylysshylar jınalyp otyr. N. Nazarbaevpen birge Temirtaý men qazaqstandyq magnıtkany salǵan onyń úzeńgilesterine alǵysym sheksiz. Eńbek jolyn keńestik kezeńde bastap, táýelsiz Qazaqstanda jalǵastyrǵan árqaısyńyzdyń eldiń damýyna qosqan úlesterińiz ushan-teńiz», - dedi Erlan Qoshanov.
«Trest Karagandajılstroı» bas ınjeneri Vladımır Gosman kezinde Astananyń 9-shaǵyn aýdanynda turǵyn úı keshenin, sırk aldyndaǵy alańdy salǵan.
«Biz elordanyń kirpishin alǵashqylardyń biri bolyp qaladyq jáne onyń álemdik deńgeıdegi qala bolatynyna sendik. Prezıdenttiń kóregendiginiń, halyqtyń birliginiń arqasynda jospar sátti iske asyp, kórkem Astana boı kóterdi», - dedi qurylysta 43 jyldyq eńbek ótili bar Vladımır Gosman.
Vladımır Gosmannyń áriptesi - «Trest Karagandajılstroı» bas ınjeneri Vladımır Korj elorda qurylysyna 8 jyl aralasqan. «Komandamyz Jeltoqsan kóshesindegi úılerdiń qasbetin jóndedi.
«Tikushaqtarǵa arnalǵan angar» saldyq. Astananyń onjyldyǵyna oraı 2008 jyly salynǵan sırk mańyndaǵy sýburqaq qurylysyna tehnıkalyq qadaǵalaý júrgizdim», - dep sol kezeńderdi eske aldy qurylys salasynda 53 jyl eńbek etip kele jatqan Vladımır Aleksandrovıch Korj. Kezdesýden keıin, barlyq shaqyrylǵan qurmetti qonaqtarǵa oblys ákimi saltanatty túrde alǵys hattar tabystady. Sonymen qatar, meımandarǵa EKSPO-2017 kórmesine arnalǵan bıletter syıǵa tartyldy.
Odan áride qonaqtar aımaq basshysymen birge Qaraǵandy qalasynyń mádenıet jáne demalys saıabaǵyna bet alyp, Elordamyzdyń týǵan kúnine arnalǵan «Arman qala - Astana» atty merekelik konsertti tamashalady. Atalmysh is-sharada qazaq estradasynyń juldyzy Baqyt Shadaeva bastaǵan ónerpazdar kesh kórigin qyzdyrdy.
Mıras Asan,
«Egemen Qazaqstan»
Qaraǵandy oblysy