«EKSPO-2017» halyqaralyq kórmesi aıasynda Ońtústik Koreıa pavılony ata-ana qamqorlyǵynsyz qalǵan balalarǵa velosıped úlestirdi. Qaıyrymdylyq aksııasy sheńberinde tabystalǵan velosıpedterdi tartý etýde kórme qonaqtarynyń da úlesi zor.
Atalǵan shara Koreıa pavılony korporatıvtik áleýmettik jaýapkershilik baǵdarlamasy aıasynda júrgizildi. Az ýaqyt buryn Koreıa pavılonynyń úshinshi qabatynda kórme qonaqtaryna velosıped qurastyrý boıynsha qaıyrymdylyq aksııasyna qatysý týraly usynys jasalǵan bolatyn. Iаǵnı, pavılon qonaqtary generatordan «energetıkalyq dán» óndiretin arnaıy oıynǵa qatysty. Energetıkalyq dán generatordyń panelin basqan saıyn óndiriledi. Árbir jınalǵan 5 myń dán úshin bir velosıped beriledi.
Nátıjesinde jınalǵan 32 velosıpedti tartý etý úshin pavılon ókilderi «SOS Qazaqstandaǵy balalar aýylyna» arnaıy at basyn burdy. Sharaǵa qatysqan Koreı agenttigi saýda jáne ınvestısııalar boıynsha klıentterdi qoldaý qyzmetiniń basshysy Son Sok Gı qaıyrymdylyq sharasyna belsene qatysqan qonaqtarǵa alǵysyn bildirdi.
«Balalar, sizder osy qaıyrymdy qala turǵyndarymen birge myqty adam bolyp ósetinderińizge senemin. Bolashaqtyń naǵyz energııasy – ózderińiz. Koreıa týraly árdaıym jaqsy áser qaldyrǵymyz keledi», dedi Son Sok Gı.
Uıymdastyrýshylardyń aıtýynsha, ıgi is «EKSPO-2017» kórmesi aıaqtalǵanǵa deıin jalǵaspaq. Ári kórme qonaqtarymen birge óndiriletin velosıpedterdiń sanyn 50-ge jetkizýdi mejelep otyr.
Korporatıvtik balalar aýylynyń dırektory mindetin atqarýshy Dana Egeshbaeva Qazaqstandaǵy SOS balalar aýylynda búginde 300-ge jýyq bala tárbıelenip jatqanyn atap ótti. Onyń aıtýynsha, áleýmettik uıym muqtaj balalar men otbasylarǵa qoldaý kórsetý maqsatynda túrli jobalar men baǵdarlamalardy júzege asyryp keledi.
Aıa О́MIRTAI,
«Egemen Qazaqstan»