Nııaz Súndetálıev – Qaraǵandydaǵy belsendi jastardyń biri. О́mirge degen qulshynysy bar qaısar jigit óziniń naýqastanǵanyna qaramastan qoǵam ómirine qomaqty úles qosyp keledi. Ǵalamtorda jeke blogyn júrgizip, jetim balalarǵa qoldaý kórsetýge muryndyq bolyp júr. Osy jyly densaýlyq saqtaý salasyna qosqan úlesi úshin «Altyn júrek» ulttyq syılyǵymen marapattaldy.
Nııaz birneshe jyl buryn alǵan jaraqatynan omyrtqasyn zaqymdap, múgedek bolyp qalǵan edi. Qazaqstandyqtar oǵan shetelde ota jasatý úshin qarjy jınap bergen. Alaıda, medısınalyq ortalyqtyń mamandary otany tegin jasaýǵa daıyn ekendikterin jetkizdi. Sondyqtan, ol birneshe jyl boıy emine jınalǵan 5 mıllıon 584 myń teńgeni Arýjan Saınniń qaıyrymdylyq qoryna aýdardy. Bul qarajat 2 jasar Sofııa Brýsenskaıanyń Seýlde alyp jatqan emine jáne basqa da naýqas balalardyń qajetine jumsaldy.
Nııazdyń erligin batyrlyqqa balaǵan qazaqstandyqtar qaıyrymdylyq konsertter uıymdastyryp, onyń emine kómek kórsetý maqsatynda bankte esepshottar ashty. Búgingi tańda múmkindigi shekteýli balalar úshin uıymdastyrylatyn sharalarǵa qoldaý kórsetip kele jatqan jomart jigittiń aıaqqa turýyna tilekshi, materıaldyq ári rýhanı kómek kórsetip júrgen jandar barshylyq.
«Meniń maqsatym da, tilegim de – densaýlyq. Osy oraıda qazaqstandyqtar maǵan kóp qoldaý kórsetedi, bul – shyn máninde qoǵamǵa kerek ekenimdi bildiredi», deıdi ol.
Sondaı-aq, ol qıyn jaǵdaıǵa tap bolǵan adamdarǵa kómekteskeni úshin Qaraǵandy oblysy ákiminiń «Qaınar» jastar syılyǵynyń jeńimpazy atandy. Búginde Qaraǵandy qalasynyń turǵyny shahardaǵy dosy kóp jastyń biri. Múgedekter arbasyna tańylǵanyna qaramastan, erteńine mol úmitpen qaraıdy.
Nııazdyń aıtýynsha, barlyq qıyndyqtarǵa moıymaı, aınalaǵa jylý shashyp, adamdardyń qýanyshty túrin kórýden asqan baqyt joq. О́z júregińniń qalaýymen júrseń, bar jaqsylyqty keıinge qaldyrýǵa bolmaıtynyn túsinesiń. Al jaqsylyq, qarapaıym sózben aıtqanda, kóńil bólý men meıirimnen turady. Adam ómiri qysqa, sondyqtan árkim óz ómirin laıyqty ótkizý úshin qaıyrymdy bolǵany durys.
Mıras ASAN, «Egemen Qazaqstan»
Qaraǵandy oblysy