Atyraýda «Ataýlar tarıhy» atty ǵylymı ekspedısııa jumysyn bastady.
Aımaqtaǵy jer-sý, fızıkalyq-geografııalyq nysandar men eldi mekenderdiń ataýlarynyń shyǵý, qalyptasý tarıhyn zerttep, málimetter bazasyn jasaqtaý maqsatynda oblystyq tilderdi damytý basqarmasy qyzmetkerleri men jergilikti ǵalymdar jolsaparǵa shyqty.
-Ekspedısııa ázirge Qurmanǵazy, Isataı, Inder aýdandarynda zertteý jumystaryn júrgizdi, - deıdi basqarma basshysy Ásııa Qystaýbaeva. – Sonyń ózinde buryn estimegen biraz málimetter belgili boldy. Mysaly, Qurmanǵazy aýdanyndaǵy Birlik aýylynda Baǵlanı degen shaǵyn tóbe bar eken, shyǵý tegi belgisiz, el arasynda kezinde alma baǵy bolǵan degen áńgime bar. Bul ǵylymı zertteýdi qajet etedi. Sol sııaqty Kinasha ózeni ataýynyń shyǵý tegin anyqtaý qajet. Osy aýdanǵa qarasty Býlgachınsk ózeniniń jaǵasynda Býlgachınskıı dep atalatyn aýyl bolypty, qazir joq. Aýyl erterekte Bulǵaqty ózeginiń jaǵalaýynda ornalasqan bolyp shyqty. Sodan Býlgachınskıı dep atalyp ketken eken. Buryn shyqqan jınaqtarda Aqkól aýyldyq okrýgi boıynsha bir kóldiń ataýy engizilse, ekspedısııa jumysynyń nátıjesinde bul óńirde kezinde 30-ǵa jýyq kól bolǵandyǵy anyqtaldy, jáne olardyń 18-iniń ataýy naqtylandy.
Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda kórsetilgen tapsyrmalar aıasynda júzege asyrylatyn bul joba 2020 jylǵa deıin jalǵasady. Jınaqtalǵan málimetter negizinde anyqtamalyq kitaptar shyǵarylady.
Baqytgúl BABASh,
«Egemen Qazaqstan».
ATYRAÝ.