Venada EQYU Turaqty Keńesiniń kezekti otyrysy ótti. Jıynda EQYU Parlamenttik Assambleıasynyń prezıdenti Krıstın Mýttonenniń, Eýrazııa ekonomıkalyq komıssııasynyń (EEK) tóraǵasy Tıgran Sargsıannyń jáne EQYU Qaýipsizdik, Ekonomıka jáne ekologııa, sondaı-aq Adamı ólshem jónindegi komıtetter tóraǵalarynyń baıandamalary tyńdaldy.
EEK tóraǵasy tuńǵysh ret EQYU Turaqty Keńes músheleriniń aldynda jasaǵan baıandamasyn Eýrazııalyq ıntegrasııanyń irgesin qalaýshy Qazaqstan Prezıdenti N.Nazarbaev bolǵanyn atap ótýmen bastady. Komıssııa tóraǵasy qatysýshylarǵa Eýrazııalyq ekonomıkalyq odaqtyń (EAEO) qyzmeti men basymdyqtary týraly jan-jaqty aqparat usyndy jáne osy kúnge deıin uıym sheńberinde júzege asyrylǵan jumystardy atap ótti.
Uıymnyń Jibek joly ekonomıkalyq beldeýi aıasyndaǵy yntymaqtastyǵy men atalǵan eki jobanyń saýda-ekonomıkalyq qatynastarda bir-birin tolyqtyrǵanyn jetkizdi. Sonymen birge qazirgi tańdaǵy komıssııanyń birikken energetıka jáne qarjy naryǵyn qurý boıynsha jumysyna nazar aýdardy jáne Eýropalyq odaq elderimen atalǵan salada yntymaqtastyq ornatýǵa shaqyrdy. T.Sargsıan EAEO-nyń EQYU-men de yntymaqtastyǵyn nyǵaıtýǵa múddeli bolǵanyn málimdedi.
Elimizdiń EQYU-daǵy Turaqty ókili Qaırat Sarybaı Qazaqstannyń EAEO-daǵy basymdyqtary men uıymǵa 2016 jylǵy tóraǵalyǵynda «Ekonomıkalyq dıplomatııa» máselelerine erekshe mán bergenin, sonymen birge jýyrda Sochıde ótken Joǵarǵy Eýrazııalyq ekonomıkalyq keńestiń otyrysy barysynda uıymnyń negizgi basymdyǵyna aınalǵan, Elbasynyń EAEO sheńberinde «sıfrlyq formatqa» kóshýge arnalǵan usynysynyń qabyldanýyna nazar aýdardy jáne atalǵan másele boıynsha EQYU men EAEO arasyndaǵy sınergııanyń mańyzdylyǵyna toqtaldy.
Sonymen qatar elshi EQYU PA basshysy K.Mýttonenniń jumysyn joǵary baǵalady jáne Qazaqstanǵa nátıjeli issaparlar jasaǵanyna nazar aýdardy. Tóraıymnyń maýsym aıynda EKSPO-2017 kórmesinde EQYU stendiniń ashylýyna qatysýyna, Astanada ótken EQYU Ekonomıka jáne ekologııalyq forýmynyń ekinshi jınalysynda baıandama jasaýyna, tamyzda «Jańa ıadrolyq qaýip-qaterge qarsy is-qımyl» taqyrybyna arnalǵan Pagýosh konferensııasyna qatysýyna alǵysyn bildire otyra, Qazaqstanda Parlament Senaty jáne Májilis tóraǵalary, Syrtqy ister mınıstri men joǵary deńgeıde birqatar Úkimet ókilderimen kezdesý uıymdastyrylýy EQYU PA-ǵa degen Qazaqstannyń yqylasyn kórsetetinin málimdedi.
EQYU Ekonomıka jáne ekologııa komıtetiniń tóraǵasy – Qazaqstan Respýblıkasynyń EQYU-daǵy Turaqty ókili Q.Sarybaı 10 aı boıy atqarylǵan komıtet jumysy týraly esep berdi. Komıtetke Qazaqstan tóraǵalyǵy barysynda transport, kóshi-qon, jaqsy basqarý, sybaılas jemqorlyqpen kúres, ınvestısııalyq klımat, saýda, ózara baılanystyq, jańarmaly energetıka, turaqty damý ispettes máseleler kóterilgenin jáne nátıjesinde EQYU mınıstrler keńesiniń qaraýyna ekonomıka jáne qorshaǵan orta boıynsha sheshim jobalary engiziletinin jetkizdi.
Qazaqstan delegasııasynyń komıtettegi jumysyna Eýropalyq odaq, AQSh, Ázerbaıjan, Vatıkan, Grýzııa, Qyrǵyzstan, Reseı, Túrkııa, Ýkraına delegasııalary joǵary baǵa berdi.
Daıyndaǵan
Joldybaı BAZAR,
«Egemen Qazaqstan»