Búgin О́skemende Qazaqstandaǵy tuńǵysh «ALTAY ATHLETICS» kásibı klýbynyń resmı túrde tusaýkeser rásimi ótti. Onyń quramyna álemdik deńgeıdegi áıgili jeńil atletshiler men Olımpıada chempıony, eki dúrkin «Gaýhar lıga» jeńimpazy Olga Rypakova kirdi. Bul týraly oblys ákiminiń baspasóz qyzmeti habarlady.
Sonymen qatar, klýb músheleriniń qatarynda naıza laqtyrýdan Qazaqstannyń jas kóshbasshylary Artýr Gafner men Varvara Nazarova da bar. Kenııalyq tórt krossmer - Karolın Chıpkoıch Kıpkırýı, Deızı Djıpkemeı, Shedrak Kımýtaı Koıch jáne Tanýı Nora Djırýto altaılyq atletshiler sapynan tabyldy.
Aıta ketý kerek, klýb aımaq basshysy Danıal Ahmetovtyń tapsyrmasy boıynsha bıyl jazda qurylǵan. Osy ýaqyt ishinde atletter álemniń bedeldi jarystaryna qatysyp, júldeli oryndarmen qanjyǵalaryn maılap úlgerdi. Máselen, 5 000 metr qashyqtyqta Karolın Kıpkırýı qyrkúıekte ótken «Gaýhar lıga-2017» dodasynyń kúmis medalin ıelense, 22 jastaǵy Nora Djırýto ISTAF Berlın klassıkalyq týrnırinde kedergiler arqyly 3 000 metrge júgirip, 3-oryn aldy.
«Osy myqty sportshylar salǵan joldy bolashaq urpaq jalǵasa deımiz. Jańa klýb aldynda zor mindetter tur. Eń birinshi, jeńil atletıkadan ulttyq quramany qalyptastyrýdaǵy negizgi dińgek bolady. Bolashaq jeńimpazdardy daıyndaımyz. «ALTAY» brendin qalyptastyryp, ony búkil álemge pash etemiz. Oǵan senimimiz zor», - dedi Danıal Ahmetov.
Eń bastysy – ShQO klýbynyń negizinde jeńil atletıkadan «ALTAY KIDS ATHLETICS» balalar akademııasy qurylady. Oǵan 2020 jylǵa deıin 5000 tarta bala men jasóspirimdi tartý josparlanyp otyr. «ALTAY ATHLETICS» kásibı jeńil atletıka klýby 94 jyldyq tarıhy bar, eýropalyq LC Zurich jetekshi klýbynyń úlgisinde jasaldy. Al menedjer mindeti 30 jyldan astam ýaqyt boıy úzdik halyqaralyq sport uıymdarynda qyzmet etken Gvıdo Tononıǵa tapsyryldy.
Azamat Qasym,
"Egemen Qazaqstan"
О́skemen