Aqtóbede Tuńǵysh Prezıdent kúni«Qazaq halqyna myń alǵys» eskertkishiniń saltanatty ashylý rásimi ótti.
Monýment - bir kezderi Qazaqstanǵa jer aýdarylǵan jáne bul kúnderi ony naǵyz otany sanaıtyn barlyq ult ókilderiniń qazaq halqyna degen rızashylyǵynyń belgisi ispetti. Joba jergilikti kásipkerlerdiń qarajatyna «Týǵan jer» baǵdarlamasy aıasynda júzege asyryldy.
- Táýelsizdiktiń alǵashqy kúnderinen bastap memleket basshysy Nursultan Nazarbaevtyń júrgizip otyrǵan saıasatynyń arqasynda kópultty elimizde halyqtar dostyǵy, birlik, tatýlyq pen turaqtylyq saltanat qurýda. 26 jyl tarıhı turǵydan alǵanda kóp merzim emes, alaıda Qazaqstan osy ýaqyt aralyǵynda úlken jetistikterge jetti. Búginde búkil álem Qazaqstandy táýelsiz, myqty memleket retinde tanıdy. Osynyń bári Tuńǵysh Prezıdentimizdiń, onyń sarabdal syrtqy jáne ishki saıasatynyń arqasynda múmkin boldy. Elimizdiń eń mańyzdy jetistikteriniń biri kópultty qoǵamda beıbitshilik pen kelisimdi saqtaý bolyp tabylady. Tarıhı turǵyda solaı qalyptasqan edi. Biz mıllıondaǵan qonys aýdarýshylardy qabyldap, ashtyq pen soǵysqa qaramastan olarmen barymyzben bólistik. Búginde olardyń urpaqtary Qazaqstandy ózderiniń týǵan úıleri, óz Otanymyz dep ataıdy, – dedi oblys ákimi Berdibek Saparbaev óziniń quttyqtaý sózinde.
Uzyndyǵy otyz metr bolatyn eskertkish shartty túrde árqaısysy erekshe maǵynaǵa ıe bes fragmentke bólingen. Fragmentterdiń birindegi jer sharynda ornalasqan Qazaqstan kartasynyń beınesi el aýmaǵynyń myzǵymas berik negizin kórsetedi. Munda, sondaı-aq, Qazaqstannyń ejelgi dáýirden búginge deıingi tarıhy týraly aqparattar beınelengen.
Jeti qyrly baǵan túrindegi eskertkishtiń negizgi dińgegi bolashaqqa turaqty damý ıdeıasyn bildiredi. Baǵannyń jeti qyry qazaqstandyq damý ıdeıasynyń oń nıeti men kıeli tunyqtyqtyǵyn aıqyndaıdy.
Eskertkishtiń joǵarǵy jaǵynda otbasynyń, týǵan ólke tarıhynyń, azat halyqtyń nyshany ispetti kıiz úı túrinde beınelengen kompozısııa ornatylǵan. Kompozısııany el Táýelsizdigi men Qazaqstannyń sabaqtastyq pen turaqty damýǵa umtylýyn bildiretin ushýǵa qanatyn jaıǵan qyran beınesi aıaqtaıdy. Eskertkishtiń artynda 14 baǵanadan turatyn 85 metrlik baǵanalar qatary ornatylǵan.
Merekelik is-shara Shyǵarmashylyq ortalyqtyń jańa konserttik zalynda «Elimniń tiregi – Elbasy» gala-konsertimen jalǵasty. QR halyq ártisi Doshan Joljaqsynov, belgili kompozıtor ári qoǵam qaıratkeri Tólegen Muhamedjanov, QR eńbek sińirgen qaıratkeri Qaragóz Súıleımenova men ózge de qazaqstandyq estrada juldyzdary ózderiniń ónerlerimen aqtóbelikterge merekelik kóńil-kúı syılady.
Aqtóbe oblysynda Qazaqstan Respýblıkasynyń Tuńǵysh Prezıdenti kúnin merekeleýge oraı elý áleýmettik, óndiristik jáne kommersııalyq nysandar paıdalanylýǵa berilip, júzden astam qoǵamdyq-saıası jáne mádenı-buqaralyq sharalar, sondaı-aq halyqtyń áleýmettik jaǵynan az qamtylǵan toptaryna arnalǵan qaıyrymdylyq sharalary ótkizildi.