Tarazda ne boldy?

Jahandaný jeli búkil dúnıeni kernep bara jatyr. Jaqsyny da ákelýde, jamandy da ákelýde. Odan Qazaqstan da atymen syrt tura almaıdy. Solaı ekenine sońǵy aılardaǵy ókinishti oqıǵalar da kóz jetkizip otyr. Keshe oblystyq IID qarasty «Dınamo» sport kesheninde qoǵam­dyq qaýipsizdikti qamtamasyz etý maqsa­tynda óz mindetin adal atqa­ryp, asa qaýipti qylmyskerdi qu­ryqtaý ústinde erlikpen qaza tap­qan oblystyq IID Jol polısııasy jeke batalonynyń 1-shi vzvod komandıri, polısııa kapı­tany Ǵazız Baıtasov pen mamandan­dyrylǵan kúzet qyzmeti basqarmasy­nyń jedel den qoıý vzvodynyń polısııa aǵa serjanty Polat Aıanqulovty aqtyq saparǵa shyǵaryp salýǵa arnalǵan qaraly mıtıng boldy. Ǵazız Ábdibekuly 1971 jyly Jambyl (Taraz) qalasynda dúnıege kelgen. Bilimi joǵary. Ál-Farabı atyndaǵy qazaq ulttyq ýnıversıtetin bitirgen. Ishki ister organda­rynda 1992 jyldan beri qyzmet atqarǵan. Osy ýaqyttar ishinde ol 2-shi jáne 3-shi dárejeli «Ishki ister organ­daryndaǵy minsiz qyzmeti úshin» medaldarymen marapattal­ǵan. So­ńynda áıeli men úsh balasy qaldy. Al, Polat Qoıshybaıuly 1983 jyly Qaraqalpaqstan Respýblıka­sy­nyń Qońyrat qalasynda dúnıege kelgen. Bilimi joǵary, Qoja Ahmet Iаsaýı atyndaǵy halyqaralyq qazaq-túrik ýnıversıtetin támam­daǵan. Ishki ister organdarynda 2005 jyldan qyzmet atqarǵan. Mamandandyrylǵan kúzet qyzmeti basqarmasynyń basshylyǵymen adal jáne minsiz qyzmeti úshin birneshe ret marapattalǵan. Sońynda áıeli men eki balasy qaldy. Qaraly mıtıngide oblys ákimi Qanat Bozymbaev, oblystyq IID bastyǵy, polısııa polkovnıgi Beket Aımaǵambetov jáne oblystyq ishki ister organdary men ishki ásker ardagerleri keńesiniń tóraǵasy О́r­nekbaı Smaıylov aı men kúnniń amanynda myltyq atyp, qarapaıym adamdarǵa qarsy oq jaýdyrǵan qanypezer qolynan erlikpen qaza tapqan tártip saqshylarynyń otba­syna, týǵan-týystaryna qaıǵyryp, kóńil aıtty. Bolǵan oqıǵany taratyp aıtsaq, 1977 jyly týǵan M.K.Qarıev ótken senbi kúni tal túste óte aýyr qylmysqa baryp, 7 adamnyń ómirin úzdi. Qaza tapqandardyń 5-ýi quqyq qorǵaý organdarynyń qyzmetker­leri. Sondaı-aq, bulardan basqa ishki ister organdarynyń 3 qyzmetkeri ár túrli dene jaraqatymen jedel járdem aýrýhanasyna tústi. Ulttyq qaýipsizdik komıteti oblystyq departamentiniń 2 qyz­met­keri syrttaı baqylap júrgenin baıqaǵan M.K.Qarıev olarǵa qarsy qarýly shabýyl jasap, ekeýin de óltirgen. Biraq ol osy qandy qyl­mysynyń izin jasyrýdyń ornyna, lańkestik maqsatyndaǵy áreketin odan ary jalǵastyrý úshin T. Zá­kı­rov degen júrgizýshige shabýyl jasap, onyń «Mazda-626» avtokóligin aıdap áke­tedi. Sóıtip, qala orta­lyǵyna kelip, qarý-jaraq dúkenine shabýyl ja­saıdy. О́kinishke qaraı, onyń bul áreketi de kisi ólimine ákelip soq­tyrdy. Iаǵnı, qarsy al­dynan shyqqan dúken qa­ra­ýyly     V.Fe­dorchenkony atyp ólti­rip, dú­kenge kelip beıqam turǵan N.E. Oraz­baqov degen beıseýet azamatty da ólimshi ǵyp jaralaıdy. Sodan keıin qarý-jaraq dúkeninen «Saıga» jáne «CZ» dep atalatyn jar­tylaı avtomat­tandyrylǵan qarý­lar men oq-dárilerdi «oljalap», sol mańdaǵy «VAZ-21099» kóligine kúsh­pen «ıelik» etedi. Dabyl bo­ıynsha sońyna túsken mamandan­dy­rylǵan kúzet bóliminiń qyzmetker­leri, polısııa serjanttary P.K.Aıanqulov pen J.A.Baıseıitovty atyp óltirip, olar­dyń qolyndaǵy «Kalashnıkov» avto­maty men «Makarov» pıstoletin ala ketedi. Jazyqsyz adamdardyń qanyna qoly bylǵanǵan saıyn qutyrǵan   M.K.Qarıev budan keıin ózi ýaqytsha turyp jatqan úıge kelip RPG-26 granata atqyshyn alyp, Ulttyq qaýipsizdik komıtetiniń ob­lystyq departamenti ǵımaraty­nyń qabyr­ǵalary men terezelerine granata atqyshpen jáne avtomatpen birneshe dúrkin oq jaýdyrady. Bi­raq odan ǵımaratqa zııan kelmegen jáne kisi ólimi oryn almaǵan. Osydan keıin sońyna túsken tártip saqshy­larynan qashyp bara jatyp jol-jónekeı kezdesken attyly 2 polıseıdi jaraqattaıdy. Saǵat 13.00-de IID Jol polı­sııasy jeke batalony qyzmetker­leriniń oǵynan jaralanyp, quryq­qa túsetinin sezgen lańkes polısııa kapıtany Ǵ.Baıtasovtyń qolynan endi qashyp shyǵa almaıtynyn bilip, kıiminiń ishine aldyn ala baılap, daıyndap alǵan jarylǵysh zatty iske qosady. – Ol kapıtan Ǵ.Baıtasovty da, basqa polıseılerdi de qasqaqana óltirdi. О́ıtkeni, ol qashýdyń orny­na, sońyna túsken polısııa qyz­metkerlerine qarsy qasarysyp oq jaýdyrdy. Al kapıtan Ǵ.Baıtasov bolsa keýdesin oq tesip ótkenine qaramastan, oǵan jetip baryp, jerge qulatty. Mine, sol kezde lańkes ózin de, bizdiń qyzmetkerimizdi de jaryp jiberdi. Bizdiń áriptesimiz erlikpen qaza tapty, – deıdi oblystyq IID tergeý basqarmasy bastyǵynyń orynbasary. Eger polısııa kapıtany Ǵ.Baıtasov lańkesti denesimen der kezinde jaýyp úlgermegende, onda jarylǵysh zattyń saldarynan sol mańdaǵy taǵy birneshe adamnyń ómiri úziler me edi, álde qaıter edi. Lańkesti ustaý kezindegi atysta polısııa serjanty S.S.Alashov ta aıaǵynan jaralandy. Lańkes jalǵyz áreket etti me, álde onyń serikteri bar ma? Qazir osy oqıǵa boıynsha vedom­stvo­aralyq arnaıy jedel tergeý toby qurylyp, tekserý amaldary júr­gizilýde. Oblystyq IID jedel-izdestirý is-sharalarynyń barysynda lańkestiń buǵan deıin Kókshetaý qalasynda turyp kelgeni jáne «jı­hadshylardy» qoldaıtyny jóninde aqparat bar. Oblys ákimi Q.Bozymbaev senbi kúni keshkilik jergilikti teledıdar arqyly oblys turǵyndaryn abyr­jymaýǵa shaqyryp, al jeksenbide qaza tapqan polısııa qymetker­le­riniń ot­basyna kóńil aıtyp shyqty. Qaza tapqan quqyq qorǵaý organ­dary qyz­metkerleriniń otbasyna qarjylaı kómek kórsetiletinin de jetkizdi. Sondaı-aq, jedel járdem aýrýhana­syna túsken polısııa qyzmetkerleriniń kóńilin surap, olardyń densaýlyqta­rynyń jaǵ­daıy­men tanysty. Al oblystyq IID basshylyǵy lańkesti quryqtaý kezinde erlikpen qaza tapqan polısııa qyzmetkerlerin memlekettik marapatqa usynbaqshy. Jeksenbi kúni qala turǵyndary polısııa qyzmetkerleri qaza bolǵan jerge gúl shoqtaryn qoıyp, aza tutty. Kósemáli SÁTTIBAIULY, Taraz.