Parlament Senatynyń depýtattary Rashıt Ákimov pen Dáýren Ádilbekov Aqmola oblysyndaǵy Zerendi aýdanynda jumys babyndaǵy saparmen boldy, dep habarlady Palatanyń baspasóz qyzmeti.
Senatorlar aýdan ortalyǵyndaǵy qazaq tilinde bilim beretin mektepti jańartý jumystarynyń barysymen tanysty. Bilim uıasyn jańartý jónindegi jobany iske asyrý eki jylǵa josparlanǵan bolatyn. Depýtattar dene shynyqtyrý-saýyqtyrý kesheninde bolǵan kezde jattyǵý bólmeleri men sportzaldy jáne basseındi aralap kórdi. R. Ákimov dene shynyqtyrý jáne sportpen aınalysýǵa aýyl turǵyndaryn tartýdyń mańyzdylyǵyn aıta kelip, keshen jumysyna oń baǵa berdi.
Aýdan aktıvimen kezdesýde senatorlar Parlamenttiń ótken jylǵy zań shyǵarý jumysynyń qorytyndylary týraly habardar etti. D. Ádilbekov depýtattar bekitken 2018-2020 jyldarǵa arnalǵan respýblıkalyq bıýdjettiń negizgi shyǵystary áleýmettik salaǵa baǵyttalǵanyn atap ótti. Depýtattyń pikirinshe, qarjylandyrýdyń 45 paıyzǵa jýyǵy adam kapıtalyn damytýǵa arnalyp otyr. Taıaýda qabyldanǵan jańa Salyq kodeksiniń erekshelikteri týraly da jan-jaqty aıtyldy.
Sharaǵa qatysýshylar depýtattarǵa birqatar saýaldar qoıyp, usynystar aıtty. Senatorlar kezdesýde aıtylǵan usynystardy zań shyǵarý jumystary barysynda nazarǵa alatyn bolady.