«Hat qorjyn» (18.01.2018)

...usynys aıtady

Zeınetkerlerge kómek kórsetilse

Men Almaty oblysynda 50 jylǵa jýyq qyzmet atqardym. Jasym 84-ke keldi, 15 jyl 3 aýdanda partııa komıtetiniń birinshi, ekinshi hatshysy qyzmetterin atqardym. Kúrti jáne Jambyl aýdandarynda astyq jınap, memleketke ótkizdik. Sol kezde jańadan qurylǵan Kúrti aýdanynda buryn arpa, bıdaı egip kórmegen keńsharlar men ujymsharlardy jańa agrotehnıkalyq ádisterge jumyldyra otyryp, shóldi-qumdaýyt jerden Otan qoımasyna 1974 jyly 2 mıllıon tonna, Jambyl aýdanyna aýysqanymda 1978 jyly 10 mıllıon tonna astyq ótkizgenimiz esimde. KSRO ónertapqyshy atanyp, birneshe orden, medalmen marapattaldym.

Elbasymyz halyqqa arnaǵan sózinde únemi aýylǵa barý kerektigin, sharýashylyqpen, kásippen shuǵyldaný qajettigin aıtady. Qart bolsaq ta, boıda qýat sarqylǵan joq. Sondyqtan Jambyl aýdanynyń Qaraqystaq aýylynan qorajaıymen birge úı salýǵa kirisip kettim. Iаǵnı qolyma taıaq ustap otyra bermeı, bızneske bet burýdy oılap aýylda mal basyn kóbeıtýdi josparlap otyrmyn. Biraq bul kásipti dóńgeletýge kólemdi qarajat qajet. Osy oraıda Eńbek jáne halyqty áleýmettik qorǵaý mınıstrligi men memlekettik zeınetaqy tóleý ortalyqtary qolynan is keletin jáne bala-shaǵasy bar qarııalardyń sharýa qojalyǵyn ashý sııaqty kásipkerlik bastamalaryna qoldaý kórsetse deımin. Máselen, kepildeme arqyly belgili bir merzimge nesıe berse, ony zeınetaqy tólemi esebinen qaıtaryp otyrsa qandaı ǵanıbet bolar edi. Bul jańa jumys ornyn qurýǵa da sep bolar edi.

Bekbolat TURYSJANOV,

Almaty oblysy jáne Jambyl aýdanynyń qurmetti azamaty

***

...rızashylyq bildiredi

Qaltqysyz qyzmet osyndaı-aq bolsyn

Osydan biraz buryn 43 jastaǵy Aıman Áýbákirova temir jol apatyna ushyrap, poıyzdyń astynda qalǵan. Aýyr jaraqattyń saldarynan bir aıaǵynan tolyǵymen aıyrylyp, ekinshi aıaǵynyń barmaqtaryna nuqsan kelgen. Bul jazataıym oqıǵany ýshyqtyrǵan jaǵdaı – Aımannyń jeke tulǵasyn kýálandyratyn eshqandaı qujaty joq eken. Ol 1997 jyly tólqujatyn joǵaltyp alyp, qaıta qalpyna keltirýge ýaqyt tappaǵan. Endi múgedek bop, úısiz-kúısiz qalǵan Áýbákirova jeke basyn kýálandyratyn qujaty bolmaǵandyqtan memleketten bólinetin áleýmettik kómekten de qaǵylady.

«Biz osyndaı qaıǵyly jaǵdaıǵa dýshar bolǵan Aıman Áýbákirova týraly estigende, birden ony izdep bardyq. Qajetti qujattaryn qalpyna keltirý máselesin óz moınymyzǵa alyp, Eńbek jáne halyqty  áleýmettik qorǵaý mınıstrligi jáne Ishki ister mınıstrligimen birge Aıman Bekbolatqyzyna jeke kýáligin jyldam jasap berdik», dedi Astana qalasy boıynsha mamandandyrylǵan HQO bólimi basshysynyń orynbasary Erkebulan Amantaev.

«Azamattarǵa arnalǵan úkimet» memlekettik korporasııasy aldymen Áýbákirovanyń týý týraly kýáliginiń telnusqasyn jasatyp, keıin jeke basyn kýálandyratyn qujatqa da qol jetkizdi. Sosyn qajetti málimetterdi birden Áleýmettik tólemderdi vedomstvoaralyq esepteý ortalyǵyna joldap, jeltoqsanda Aıman Áýbákirovaǵa múgedektigi boıynsha járdemaqy berildi.

Ásel MIZAMQYZY

Astana

***

...úlgi tutady

Internattyń ár kúni mazmundy

Bizdiń ujymnyń shyǵarmashylyq-pedagogıkalyq toby tárbıe­lenýshilerdiń ár kúni tekten-tek, maǵynasyz ótpeýi úshin turaqty is-sharalar keshenin ornyqtyrdy. Mektep-ınternat janyndaǵy kolledjdik toptarda olar tiginshi jáne shashtaraz mamandyqtaryn meńgere alady. Bul salalar balalardyń áleýmettik ortaǵa beıimdelip, ómirden óz oryndaryn tabýyna yqpal ete alady. Oqýshylardyń jan-jaqty damýyna qajetti basqa da múmkindikter qarastyrylǵan. Mekteptiń materıaldyq-tehnıkalyq bazasy jyldan-jylǵa jaqsaryp keledi. Internattyń ereksheligine saı logopedııalyq qural-jabdyqtar ornatylǵan kabınetter de jasaqtaldy.

О́tken jyly estý qabiletiniń tómendigi týa bitti paıda bolǵan búldirshinderge arnalǵan oıyn alańy salyndy. Sonymen birge mekteptiń kireberisine pandýstar ornatyldy. Ujymdaǵy osyndaı ózgerister men jańalyqtardy «Egemenniń» hat qorjynyna joldaǵandy jón kórdim.

Elvıra QOBYLASh,

Aqtóbe oblystyq estý qabileti tómen balalar mektep-ınternatynyń ádiskeri

***

...jańalyǵyn jetkizedi

Sporttyq-saýyqtyrý keshenine rızamyz

Aqtaýda byltyr «Melovoı» sporttyq-saýyqtyrý kesheni ashylyp, el rıza bolǵan edi. Búgingi kúni sport kesheni bes fýnk­sıonaldyq bólimnen turady. Aýdany 470 sharshy metr bolatyn fýtbol, voleıbol, basketbol jáne kórkem gımnastıka boıynsha ótetin jattyǵýlarǵa arnalǵan ámbebap sport zaly bar. Ol zamanaýı sporttyq quraldarmen jabdyqtalǵan. Alańy 216 sharshy metr bolatyn shyǵys jekpe-jegi zaly, jabyq júzý basseıni, zamanaýı jabdyqtarmen, fıtnes trenajerlermen jabdyqtalǵan, aýdany 300 sharshy metr bolatyn trenajer zaly, rezeńke jabyny bar shaǵyn fýtbol ashyq alańy bar.

Bul aýqymdy is-shara salamatty ómir saltyn nasıhattaýǵa, deni saý urpaqty tárbıeleý men buqaralyq sportty damytýǵa óz yqpalyn tıgizedi.

Aman BOLSYN

Aqtaý

***

...renish bildiredi

Shapalaqty surap alǵan asaba

 Qoǵamymyzda sany bar, sapasy joq asabalar qaptap ketti. Jaqynda sondaı asabalardyń birimen toıda boldym. Asaba jap-jas jigit, qaljyńy ma, shyny ma, jetinshi synyptan bastap toı-bızneste júr eken. Jastyǵy shyǵar, bos sóz, maǵynasyz qaljyńmen úlkenderdi ábden mezi etti. «Kim shapalaq ursa, toıdan qaıtqanda bir qap aqsha tapsyn, shapalaq urmaǵandardy bir top ıt qapsyn!», «Toı ıesin syılap kelgenderińiz ras bolsa, qatty shapalaq uryp jarysyńyzdar!», «Jastar baqytty bolsyn degender shapalaq ursyn, baqytsyz bolsyn degender shapalaq urmasyn!», dep kesh boıy keıbir ánshiler sekildi shapalaq suraýmen boldy. Keremet jarasymdy ázil, kórikti oı, tartymdy, ónegeli sóz aıtylyp jatsa rıza bolǵan halyq onsyz da shapalaq urady ǵoı. Shapalaqty surap alǵan asabada ne qasıet bar deısiz...

Áıteýir, bir biletinim – beıaýyz asabalardyń kóbeıip ketýi jaqsylyqtyń nyshany emes. «Pyshaqty bos ustasań qol kesedi» demekshi, asabaǵa da qatań talap qoıa bilýimiz kerek.

Maqsat QARǴABAI

Ońtústik Qazaqstan oblysy