Almatyda zaǵıp jáne kózi nashar kóretin balalardan quralǵan orkestr mýzykalyq aspaptar satyp alý úshin «Atamekenim» aksııasynyń aıasynda arnaıy konsert uıymdastyrdy.
Atalmysh ult aspaptary orkestrinde óner kórsetetin kózi nashar kóretin jáne zaǵıp 30 balanyń barlyǵy da Almaty qalasynda ornalasqan №4 N.Ostrovskıı atyndaǵy ınternattyń tárbıelenýshileri. Án salyp, túrli aspaptarda oınap, konsertter ótkizip júrgen bul balalar úshin mýzyka jaı ǵana ýaqyt ótkizýge arnalǵan qyzyǵýshylyq emes, bolashaqta aınalysatyn kásipteri ekenin jetkizgen mýzykant Dana Meıirbekova mýzykamen aınalysqysy keletin zaǵıp balalar qatary artyp kele jatqanyn, biraq bárine birdeı mýzykalyq aspap jete bermeıtinin, sondyqtan oqýshylarǵa kómektesý maqsatynda arnaıy konsert uıymdastyrylyp otyrǵanyn aıtty.
«Inklıýzıvti bilim alatyn balalarǵa arnalǵan baıqaýda qazylar alqasynyń múshesi boldym, sol kezde osy orkestr týraly bildim. Balalar taǵdyryna shaǵym aıtpaı, óz betterimen ómir súrýdi úırenýge talpynǵandary shabyttandyrdy. Kórermen jas mýzykanttardyń talpynysyn baǵalap, qajetti aspapty satyp alýǵa qol ushyn sozady dep oılaımyn. Balalardy qoldaı otyryp, konsertke ózim, ulym jáne mýzykant dostarym da qatysady. Bul is-sharany «Atamekenim» aksııasynyń aıasynda ótkizip otyrmyz. Byltyr Almaty qalasy kásipkerler palatasynda kýrstan óttim. Bizge qoldaý kórsetti, «Art Mobile» mobıldi óner mektebiniń ashylýyna arnaıy grant utyp aldyq. Biz endi bıznestiń ókilimiz, osylaısha ózimizdiń áleýmettik jaýapkershiligimizdi kórsetemiz», dedi D.Meıirbekova.
N.Ostrovskıı atyndaǵy zaǵıp jáne kózderi nashar kóretin balalarǵa arnalǵan mektep-ınternattyń tárbıelenýshisi, týǵannan zaǵıp Ermek Baısalbekovtiń aıtýynsha, 2-synypta oqyp júrgende ózine qandaı aspapta oınaǵysy keletini týraly suraq qoıylǵanda baıandy tańdaǵanyn aıtady. Notany Braıl júıesi arqyly tanyǵan Ermek arnaıy ádebıet jetispegenmen, erekshe estý qabiletiniń arqasynda baıanda oınaýdy ońaı meńgerip alǵan eken.
«Mýzykamen aınalysqanyma 6 jyl boldy. Bolashaqta mýzykant atanyp, túrli konsertterge qatysqym keledi. Ustazymyzdyń ózi de osy ınternatta oqyp, mýzykalyq kolledji aıaqtaǵan, qazir bar bilgenin bizge úıretip júr», deıdi E.Baısalbekov.
Kesh sońynda qaıyrymdy jandar tarapynan zaǵıp balalardan turatyn orkestrge kontrabas-dombyra men eki bas dombyra syıǵa tartyldy. Al konsertten túsken qarajatqa balalar baıan men urmaly aspaptar satyp almaqshy.
Mıra Baıbek, «Egemen Qazaqstan»
ALMATY