Ortalyq kommýnıkasııalar qyzmetinde Eńbek jáne halyqty áleýmettik qorǵaý mınıstrligi Eńbek, áleýmettik qorǵaý jáne kóshi-qon komıtetiniń tóraǵasy Aqmádı Sarbasovtyń qatysýymen «Eńbek zańnamasynyń saqtalýyn baqylaý nátıjeleri» taqyrybynda baspasóz máslıhaty ótti.
Aqmádı Sarbasovtyń aıtýynsha, 2017 jyldyń qorytyndysy boıynsha Búkilálemdik ekonomıkalyq forýmynyń Jahandyq básekege qabilettilik ındeksiniń «eńbek naryǵynyń tıimdiligi» faktory boıynsha Qazaqstan 140 eldiń ishinde 35-shi orynǵa ıe boldy. Bul jańartylǵan eńbek zańnamasynyń ǵana emes, sonymen birge áleýmettik seriktestermen birge qabyldanatyn júıelik sharalardyń da nátıjesi.
«О́tken jyly úshjaqty komıssııa eńbekaqy boıynsha qaryzy bar 305 kásiporyndy anyqtady. 2017 jyldyń qorytyndysynda jumys berýshiler tarapynan 22,1 myń jumysshyǵa 3,1 mlrd teńge bereshek óndirildi. Jumysshylardy qysqartýdy josparlaǵan 75 kásiporynda 3,7 myń qyzmetkerdi jumystan bosatpaýǵa baǵyttalǵan sharalar qabyldandy, al 185 myńnan astam jumysshysy bar 422 kásiporyn eńbek jáne áleýmettik zańnamany jıi buzatyn kásiporyndar retinde táýekelge jıi ushyraıtyndar qatarynda», dedi bas eńbek ınspektory.
Jáne de ol 2017 jyly jeke eńbek kelisimsharttarynyń sany 60 myńǵa artqanyn, búgingi kúni qyzmetkerlerdi qysqartýdyń aldyn alýǵa baǵyttalǵan 115 myń memorandým jasalǵanyn, sonyń nátıjesinde 2,8 mln jumys orny saqtalyp qalǵanyn baıandady.
Aqmádı Sarbasovtyń aıtýynsha, 2017 jyly azamattardyń ótinishteri boıynsha 9 920 jospardan tys tekserý júrgizilgen.
«Olardyń basym bóligi jaldamaly jumysshylar jáne jumystan bosatylǵandar. Olardyń shaǵymy boıynsha 14,9 myńnan astam zań buzýshylyq anyqtaldy. Tekseris nátıjesinde 467 mln teńge aıyppul salý týraly sanksııalar berildi», dedi komıtet tóraǵasy.
Onyń pikirinshe, eńbek qaýipsizdik jaǵdaılaryn qamtamasyz etý máselelerinde oń ózgerister baıqalady. Sońǵy 3 jylda óndiris oryndarynda zardap shekkender qatary 16 paıyzǵa azaıǵan.
«Ekonomıkanyń salalary boıynsha eń kóp zardap shegetin jumysshylar ken-metallýrgııalyq keshenderde –16,0 paıyz jáne qurylys ındýstrııasynda 15,2 paıyz bolyp tirkelgen. Jańa Eńbek kodeksi qaýipsiz eńbek jaǵdaılaryn jaqsartý úshin óndiristik keńester qurýdy qarastyrady. Búginde 12 myńnan astam osyndaı keńes qurylǵan kásiporyndar arasynda 140 jumys berýshige «Senim sertıfıkaty» tabystaldy. Eske sala keteıik, jumys berýshilerge eńbek zańnamasynyń talaptaryna sáıkes deklarasııa qaǵıdalary negizinde senim sertıfıkattary beriledi. Mundaı kýálikti alǵandarǵa úsh jyl ishinde tekseris júrgizilmeıdi», dedi ol.
Raýan QAIDAR, «Egemen Qazaqstan»