Ortalyq kommýnıkasııalar qyzmetinde Qazaqstan Respýblıkasy Syrtqy ister mınıstriniń orynbasary Erjan Ashyqbaevtyń qatysýymen «Qazaqstan Respýblıkasy Prezıdentiniń Amerıka Qurama Shtattaryna sapary» taqyrybyna arnalǵan baspasóz máslıhaty ótti.
Jıyn barysynda spıker Elbasynyń Nıý-Iork pen Vashıngtonǵa jasaǵan sapary Qazaqstandaǵy ǵana emes, AQSh-taǵy saıası maýsymnyń shymyldyǵyn ashqan sapar bolǵanyn tilge tıek etti.
«Sebebi Elbasy sapary 2018 jylǵy AQSh astanasyna shetel kóshbasshylary tarapynan jasalǵan alǵashqy sapar bolyp tabylady. Sapar barysynda N.Nazarbaevtyń jumys baǵdarlamasy tyǵyz boldy. О́zderińizge málim, Prezıdent AQSh basshysymen jeke kezdesýmen qatar, keńeıtilgen quramdaǵy kelissózder ótkizdi. Bul sapar – Qazaqstan – AQSh qarym-qatynasy tarıhyndaǵy betke ustar eleýli oqıǵalardyń biri. Nege deseńizder, ekijaqty kezdesý nátıjesi boıynsha qabyldanǵan Birlesken málimdeme – bul Qazaqstan men AQSh-tyń HHI ǵasyrdaǵy keńeıtilgen strategııalyq áriptestigi jónindegi mańyzdy qujat. Birlesken málimdemede ekijaqty qarym-qatynastardyń ózekti máselelerimen qatar, kóptegen halyqaralyq problemalar qamtyldy. Aldaǵy ýaqytta qarym-qatynasymyz qarqyndy damıtynyna senimdimin», dedi Erjan Ashyqbaev.
Jýrnalısterdiń qoıǵan suraǵyna oraı spıker eki el arasyndaǵy vızalyq jeńildikter máselesine de toqtalyp ótti.
«Vızalyq jeńildikter boıynsha aıtar bolsaq, qazirgi tańda Qazaqstan azamattary Amerıka Qurama Shtattaryna 10 jyldyq vızalar alýǵa quqyly. Biz amerıkalyq áriptestermen 2016 jyldan bastap ekijaqty negizde 10 jyldyq vızalar berý jóninde ýaǵdalastyqqa qol jetkizgen bolatynbyz. Bul turǵydaǵy basymdyq qazaqstandyq bıznes ókilderine, oqýshylarǵa, týrısterge beriledi», dedi Syrtqy ister mınıstriniń orynbasary.
Sonymen qatar Erjan Ashyqbaev Aýǵanstannyń Kabýl qalasynda bolǵan terrorlyq shabýylǵa qatysty pikir bildirdi.
«Kabýldaǵy «Interkontınental» qonaq úıine jasalǵan terrorısterdiń shabýylynan Qazaqstan azamaty qaza boldy. 1978 jyly týǵan Astana qalasynyń turǵyny Aýǵanstanda iskerlik maqsatymen, dálirek aıtsaq, telekommýnıkasııa salasynda jumys istep jatqan bir aýǵan kompanııasynyń shaqyrtýymen barǵan. Qazirgi tańda bizdiń dıplomattarymyz mert bolǵan azamatymyzdyń denesin Qazaqstanǵa jetkizý máselesimen aınalysýda. Bizdiń aqparat boıynsha, ol kisi Aýǵanstanǵa qazan ne, qarasha aıynda barǵan», dedi ol.
Raýan QAIDAR, «Egemen Qazaqstan»