«Anadolý» agenttiginiń habarlaýynsha, qańtardyń jıyrmasynda Túrkııa Qarýly kúshteriniń Bas Shtaby kúrdterdiń baqylaýyndaǵy Sırııanyń soltústik-batysynda ornalasqan Afrın qalasynda soǵys operasııasynyń bastalǵanyn resmı málimdegen.
«Záıtún butaǵy» dep atalǵan operasııaǵa túrik áskeriniń qoldaýyna ıe Sırııadaǵy oppozısııalyq kúshterdiń otrıadtary tartylǵan. Sondaı-aq Túrkııa áskerı avıasııaǵa júginýde. Ankaranyń málimdeýinshe, áskerı operasııanyń maqsaty – Túrkııanyń shekarasyn qorǵaý, aımaqtaǵy qaýipsizdikti qamtamasyz etý, kúrd jasaqtary men DAISh-ke qarsy turý.
Halyqaralyq qaýymdastyqta Sırııadaǵy kúrdterdiń YPG tobyna qatysty kózqaras birjaqty emes. Túrkııa YPG (kúrd. Yekîneyên Parastina Gel – Halyqty qorǵaý jasaqtary – red.) dep atalatyn kúrd jasaqtary tobyn burynnan Kúrdistannyń jumysshylar partııasymen (PPK) baılanysy bar terrorıstik uıym retinde baǵalaıdy. Sondyqtan da toptyń Sırııanyń soltústigindegi aımaqtardy DAISh áskerinen azat etýin óz terrıtorııasyna qaýip dep kóredi. Al BUU, EO jáne AQSh sırııalyq kúrdterdiń YPG tobyn DAISh-ke qarsy tıimdi kúsh retinde baǵalaıdy. AQSh Túrkııaǵa YPG tobyna qarsy áskerı shabýyldy toqtatý úshin qysym jasap, sırııalyq kúrdterdi operasııalar aýmaǵyn keńeıtpeýge shaqyryp kelgen. EO Túrkııany Sırııa terrıtorııasyndaǵy áskerı operasııalardan bas tartyp, álemdik alpaýyttardyń eldegi jaǵdaıdy turaqtandyrýǵa baǵyttalǵan talpynystaryn joqqa shyǵarmaýǵa shaqyrýda. BUU Túrkııany halyqaralyq zań talaptaryna saı áreket etýge úndeýde.
Sarapshylar Túrkııanyń bul qadamy Sırııadaǵy jaǵdaıdy odan ári ýshyqtyra túsedi degen oıda. Londondaǵy Teneo Intelligence kompanııasynyń negizin salýshylardyń biri Ýolfango Pıkkolı Bloomberg-ke «Túrkııanyń Afrın qalasyndaǵy bul operasııa jeti jyl boıy sozylyp kele jatqan soǵysta jańa oshaqtyń tutanýyna sebep bolyp qana qoımaı, Ankara men Vashıngton arasynda ýshyǵyp turǵan baılanysty odan saıyn kúrdelendire túsedi» degen pikirin bildirgen.
VVS-diń habarlaýynsha, Túrkııanyń osy ýaqytqa deıin jalǵasyp kelgen shabýyldaryna qaramastan AQSh-tan qoldaý tapqan Sırııadaǵy kúrdterdiń YPG toby men arabtardyń Sırııanyń Demokratııalyq Kúshteri (SDF) uıymy arasyndaǵy odaq túrli terrorıstik uıymdardyń baqylaýyndaǵy birneshe strategııalyq aımaqty óz baqylaýyna alǵan. Osy aıda odaq jıhadshylardy Túrkııamen shekaradaǵy Jarablýs qalasyna qaraı sheginýge májbúrlegen. Jarablýs qalasy DAISh-ke qarsy kúrestiń kelesi nysanasy bolady degen pikir bar. Al Túrkııa bolsa Sırııanyń soltústiginde «býfferli zona» qurý úshin mańyzdy sanalatyn shekaradaǵy Azaz qalasyn kúrdter basyp alady dep qaýiptenýde.
Kúrdter AQSh bastaǵan DAISh-ke qarsy koalısııany kezinde Túrkııa men Iraktaǵy Kúrdistannyń jumysshylar partııasyn (PPK) shabýyldaýǵa paıdalansa, qazir ony Sırııanyń soltústigindegi YPG tobyna qarsy paıdalanýda dep aıyptaýda. Kúrdterdiń aıtýynsha, Túrkııanyń olarǵa qarsy shabýyly DAISh-tiń kúsheıýine jaǵdaı jasap, Sırııa men Iraktaǵy kúrd fronttarynyń álsireýine ákeledi-mis.